اقتوبەدە اگروونەركاسىپتىك كەشەندەگى مەملەكەتتىك ينسپەكسيا كوميتەتىنىڭ قالالىق اۋماقتىق ينسپەكسياسىنىڭ باسشىسى ەرلان يبراشيەۆ قىزمەتتىك ادەپتى بۇزعانى ءۇشىن سوگىس الدى، دەپ حابارلايدى Dalanews.kz.
مەملەكەتتىك قىزمەت ىستەرى اگەنتتىگىنىڭ اقتوبە وبلىسى بويىنشا دەپارتامەنتىنىڭ مالىمەتىنشە، يبراشيەۆ پەن ونىڭ ارىپتەسى، باس مامان ا. سەيتمۇحامبەتوۆا اراسىندا قىزمەتتىك داۋ تۋىنداعان. دەپارتامەنتتىڭ باسقارما باس مامانى دانيار ماحامبەتوۆتىڭ ايتۋىنشا، سەيتمۇحامبەتوۆا باسشىنىڭ كابينەتىنە رۇقساتسىز كىرىپ، امانداسپاعان. وسى ساتتە ەكەۋارا سوزگە كەلىپ، داۋ ۇلعايعان.
"جيىن بارىسىندا سەيتمۇحامبەتوۆا يبراشيەۆتەن كەشىرىم سۇرادى. ءبىراق يبراشيەۆ ونى قابىلداماي، سەيتمۇحامبەتوۆا "ەندى سەنىڭ اياعىڭدى سۇيەيىن بە؟" دەپ مىسقىلداعان. وسىدان كەيىن باسشى اشۋعا بوي الدىرىپ، "ەي، سەن، نە ەكىجۇزدەنىپ وتىرسىڭ، افەريستەنبە!" دەگەن سوزدەر ايتىپ، جيىن سوڭىنا جەتپەي زالدان شىعىپ كەتكەن"، – دەدى ماحامبەتوۆ.
ادەپ جونىندەگى كەڭەستە ەرلان يبراشيەۆ بۇل ارەكەتىن دەنساۋلىعىنا بايلانىستى كوڭىل كۇيىنىڭ ناشارلاۋىمەن ءتۇسىندىردى.
"ەكىجۇزدى" دەپ ايتقانىم راس. ءبىراق "افەريسسىڭ" دەگەن جوقپىن، ول – بۇرمالانعان. مەن تەك "افەريست ادامنىڭ ءىسىن ىستەپ تۇرسىڭ" دەدىم. العاشىندا كەشىرىم سۇراعان ارىپتەسىم كەيىن مازاقتاپ، "سەنىڭ اياعىڭا جىعىلايىن با؟" دەگەن سوڭ، ەموسياما ەرىك بەرىپ قويدىم"، – دەپ تۇسىنىكتەمە بەردى يبراشيەۆ.
كەڭەس مۇشەلەرى يبراشيەۆتىڭ ارەكەتى مەملەكەتتىك قىزمەتكەر ەتيكاسىنا ساي كەلمەيتىنىن ايتىپ، ۇجىم ىشىندەگى قارىم-قاتىناستى رەتتەي الماعانى ءۇشىن وعان سوگىس تۇرىندەگى تارتىپتىك جازا قولدانۋ تۋرالى شەشىم شىعاردى.
