Senat depýtaty Nurtóre Júsip jańa Konstitýtsiianyń el ómirine tigizetin naqty áseri týraly aityp berdi. Onyń sózinshe, qujat qoǵamnyń ishki suranysynan týyndaǵan zańdy ári ýaqytyly qadam bolyp otyr, dep habarlaidy Dalanews.kz.
«Sońǵy jyldary el ishinde ádildikke, ashyqtyqqa jáne halyqtyń memlekettik basqarýǵa keńinen qatysýyna degen qajettilik aiqyn sezildi. 15 naýryzda ótken jalpyulttyq referendým azamattardyń el taǵdyryna beijai qaramaitynyn jáne saiasi júieni jańǵyrtýǵa daiyn ekenin kórsetti. Jańa Konstitýtsiianyń basty aiyrmashylyǵy – biliktiń shekten tys ortalyqtanýyn azaityp, ony teńgerimdi ári tiimdi modelge kóshirýinde», – dedi depýtat.
Nurtóre Júsiptiń aitýynsha, jańa Konstitýtsiia kúndelikti ómirde naqty ózgerister ákeledi. Ol buryn quqyqtar kóbine qaǵaz júzinde ǵana qalsa, endi olardy qorǵaýdyń tiimdi mehanizmderi paida bolǵanyn aitty.
«Azamattar óz quqyqtary buzylǵan jaǵdaida tikelei Konstitýtsiialyq Sotqa júgine alady. Sonymen qatar jergilikti ózin-ózi basqarý júiesiniń damýy arqyly halyq óz óńirindegi máselelerdi sheshýge qatysa alady. Iaǵni árbir azamat óz aýylynyń, qalasynyń damýyna yqpal ete alady», – dep atap ótti senator.
Jańa Konstitýtsiia elimizdiń damýyn demokratiialyq, teńgerimdi basqarý modeline kóshiredi.
«Endigi basty qaǵida – “Kúshti Prezident – yqpaldy Parlament – esep beretin Úkimet”. Bul bilik tarmaqtarynyń arasyndaǵy naqty tepe-teńdikti qamtamasyz etedi jáne árqaisysynyń jaýapkershiligin arttyrady. Uzaq merzimdi perspektivada bul elimizdiń turaqtylyǵyn nyǵaityp, ekonomikalyq damýǵa oń áserin tigizedi», – deidi Nurtóre Júsip.
Senatordyń sózinshe, jańa Konstitýtsiiada adam quqyqtary men bostandyqtary eń joǵary qundylyq retinde bekitilgen.
«Jer men tabiǵi resýrstardyń halyqqa tiesili ekendigi aiqyndalyp, olardy paidalaný kezinde halyq múddesiniń basymdyǵy qamtamasyz etiledi», – dedi senator.
Nurtóre Júsiptiń pikirinshe, qarapaiym azamat Konstitýtsiia mátinin tolyq oqymasa da, onyń naqty áserin kúndelikti ómirde sezinedi. Ádil sot sheshimderi, memlekettik organdardyń ashyq ári esep beretin jumysy, óz ótinishterine jedel ári naqty jaýap alý arqyly adamdar bul ózgeristerdi baiqaidy. Ýaqyt óte kele jergilikti deńgeide halyqtyń pikiri eskerilip, sheshim qabyldaý protsesine qatysý múmkindigi artqan saiyn reformalardyń shynaiy áseri kúsheie túsedi.
