QMA Almaty qalasy boıynsha departamenti «Eńbek resýrstaryn damytý ortalyǵy» AQ jáne «Birinshi kredıttik búro» JSHS laýazymdy tulǵalaryna qatysty iri kólemde para alý jáne berý faktisi boıynsha sotqa deıingi tergeý bastady, dep habarlaıdy Dalanews.kz.

Tergeý barysynda «Birinshi kredıttik búro» JSHS basshylyǵy qarjy uıymdarynyń suranystaryn óńdeýge qajetti aqparattyq qyzmetter kórsetý kezinde óz múddelerin ótkizý maqsatynda «Eńbek resýrstaryn damytý ortalyǵy» AQ basshylyǵyna júıeli túrde zańsyz syıaqylar bergeni anyqtaldy.

2025 jylǵy 28 maýsymda Almaty qalasy boıynsha Ekonomıkalyq tergep-tekserý departamentiniń qyzmetkerleri jedel-izdestirý sharalary barysynda kezekti 75 myń AQSH dollary kólemindegi para berý kezinde ustalǵandar:

Rýslan Omarov – «Birinshi kredıttik búro» JSHS-niń bas dırektory,

Aqmádı Sarbasov – «Eńbek resýrstaryn damytý ortalyǵy» AQ-nyń basshysy, buǵan deıin Qazaqstan Respýblıkasynyń Eńbek jáne halyqty áleýmettik qorǵaý mınıstrliginiń birinshi vıse-mınıstri qyzmetin atqarǵan;

Dáýlet Arǵandykov – «Eńbek resýrstaryn damytý ortalyǵy» AQ-nyń burynǵy basshysy, buryn Qazaqstan Respýblıkasynyń Densaýlyq saqtaý jáne áleýmettik damý vıse-mınıstri qyzmetin atqarǵan.

Kúdiktilerdiń turǵylyqty jerin tintý barysynda 370 myń AQSH dollary jáne 4,5 mln teńge kóleminde aqsha qarajaty tárkilendi.

2025 jylǵy 30 maýsymda sot sanksıasymen A.Sarbasovqa, R. Omarovqa jáne D.Arǵandykovqa qatysty 2 aı merzimge qamaýǵa alý túrindegi bultartpaý sharasy qoldanyldy.

Tergeý jalǵasýda.

QR QPK-niń 201-babyna sáıkes ózge aqparat jarıa etýge jatpaıdy.