Halyqqa medısınalyq qyzmet kórsetý standarttaryna sáıkes, qalada ár 250 myń adamǵa shaqqanda bir ınsýlt ortalyǵy bolýy kerek.
Jańadan boı kótergen ortalyq endigi kúni Baıqońyr aýdanynyń turǵyndaryna qyzmet kórsetetin bolady. Sonymen qatar, ortalyqta ınsýlttyń aldyn alý jáne emdeý úshin asa qajet magnıtti-rezonanstyq tomograf iske qosyldy. Jabdyq qan-tamyr tútikshelerin tolyqtaı zertteýge múmkindik beredi.
Sondaı-aq, onyń memlekettik búdjettiń esebinen satyp alynǵanyn aıta ketken jón.
– Insýlt eminiń birinshi talaby – dert tıgen adamǵa 1 saǵat ishinde kómek kórsetip úlgerý kerek. Der kezinde jasalǵan em adamnyń keıin múgedek bolyp qalmaýyna, densaýlyǵynyń tolyqtaı qalpyna kelýine tikeleı áser etedi. Ashylyp otyrǵan ortalyq ınsýltke qarsy jasalatyn qajetti qural-jabdyqtarmen, medısınalyq mamandarmen jetkilikti túrde qamtamasyz etilgen, – dedi Kópsalaly medısınalyq ortalyqtyń dırektory Muhtar Tóleýtaev.
Insýlt ortalyǵy aıyna 50-60 naýqasty qabyldaýǵa qabiletti. Munda ınsýltke shaldyqqandardy saýyqtyrýdyń birinshi, ekinshi kezeńdik dárigerlik kómegi kórsetiledi. Bolashaqta osynda naýqastardy emdeýdiń tolyq sıkly júzege asyrylatyn bolady.
