Alqaly jiynǵa Halyqaralyq Túrki akademiiasynyń prezidenti Darhan Qydyráli, L.N. Gýmilev atyndaǵy Eýraziia ulttyq ýniversitetiniń rektory Erlan Sydyqov, QR Parlamenti Májilisiniń depýtaty, alashtanýshy Berik Ábdilaniuly, Memlekettik tarih institýtynyń direktorynyń orynbasary Erkin Ábil, memleket jáne qoǵam qairatkerleri Jabal Erǵaliev, Abai Tasbolatov, Erjan Isakýlov, L.N. Gýmilev atyndaǵy Eýraziia ulttyq ýniversitetiniń prorektory Dihan Qamzabekuly, filologiia ǵylymdarynyń doktory Serik Negimov, sonymen qatar kórnekti memleket jáne qoǵam qairatkerleri, QR Parlamenti depýtattary, ǵylymi-zertteý ortalyqtarynyń basshylary, tanymal ǵalymdar, JOO ustazdary, sondai-aq ziialy qaýym ókilderi men BAQ jetekshileri qatysty.
Taǵylymdy is-sharaǵa qatysýshylar aldymen Nur-Sultan qalasyndaǵy «Qaraótkel» ziratyna baryp, osynda jerlengen Kenesary han sarbazdarynyń rýhyna taǵzym etti.
Budan keiin alqaly jiyn L.N. Gýmilev atyndaǵy Eýraziia ulttyq ýniversitetiniń bas ǵimaratynda jalǵasty.
Keleli basqosý aiasynda Túrki akademiiasy ázirlegen «Kenesary han» atty kitaptyń tusaýkeser rásimin jasaldy.
Jinaqqa Kenesary han men onyń qasyndaǵy Naýryzbai, Sarjan, Esengeldi batyrlardyń qaharmandyǵy men erligi jyrlanǵan ańyz-áńgimeler, tarihi jyr-dastandardyń tańdaýly úlgileri iriktelep toptastyrylǵan.
Atalǵan shyǵarmalarda saiypqyran Kenesarynyń tuńǵiyq aqyl-parasaty, hanǵa laiyq bekzat bolmysy, qazaq jerin syrtqy dushpandardan qorǵaý jolyndaǵy soǵystary, sońyna ergen jaýjúrek batyrlarynynyń kúreskerlik beinesi shynaiy ári kórkem beinelengen.
Aita ketý kerek el arasynda Kenesary hannyń ómir jolyn, joryqtary men shaiqastaryn sýretteitin kóptegen jyrlar men ańyzdar saqtalǵan. Olardyń alǵashqy nusqalary HIH ǵasyrdyń ekinshi jartysynan bastap hatqa túsip, jariialana bastady.
Halyq jyrynyń alǵashqy nusqasyn kórnekti túrkolog V.V. Radlov óziniń «Obraztsy narodnoi literatýry tiýrkskih pleme, jivýshih v Iýjnoi Sibiri i Djýngarskoi stepi» degen irgeli eńbeginde «Kenesary óleńi», «Kenesary jyrynyń birnesshe aýyzy» degen atpen 1870 jyly jariialaǵan. «Han Kene» jyry S. Jantórin men T. Seidalin hatqa túsirip, keiin orys tiline aýdaryp «Zapiski T. Seidalin hatqa túsirip, keiin orys tiline aýdaryp «Zapiski Orenbýrgskogo otdela Imperatorskogo Rýsskogo geograficheskogo obshestva» jýrnalynda1875 jyly jariialanǵan.
Onan keiin J.Shaihislamulynyń jyrlaǵan «Kenesary-Naýryzbai» jyry 1912 jyly «Qazan» baspasynan jeke kitap bolyp jaryq kórdi. Al Nysanbai jyraýdyń J.Basyǵarin jazyp alǵan nusqasyn H. Dosmuhammeduly Tashkentte 1923 jyly, keiin N. Tórequlov 1924 jyly Máskeýde jeke kitap qylyp jariialaǵan.
Kópshilik nazaryna usynylǵan «Kenesary han» kitabyn M.Áýezov atyndaǵy Ádebiet jáne óner institýtynyń aǵa ǵylymi qyzmetkerleri Nurjuma Elesbai jáne Nasihat Nabiolla qoljazbadan oqyp mátintanýlyq jumystar atqaryp, qurastyryp shyǵardy.
