Astananyń Nura aýdany aýmaǵynda jasóspirimder arasyndaǵy quqyqbuzýshylyqtardyń aldyn alý maqsatynda «Zań jáne tártip» kontseptsiiasy aiasynda kezekti túngi reid ótkizildi,- dep habarlaidy Dalanews.kz
Is-sharany Nura aýdandyq politsiia basqarmasy jergilikti atqarýshy organdarmen, múddeli memlekettik jáne qoǵamdyq uiymdarmen birlesip uiymdastyrdy.
Reid barysynda quqyq qorǵaý organdary tanymal túngi klýbtar, ortalyq saiabaq, saýda jáne oiyn-saýyq ortalyqtary, kompiýterlik klýbtardy tekserdi.
Maqsat – balalar men jasóspirimderdiń qaýipsizdigin qamtamasyz etý, olardyń qatysýymen nemese olarǵa qatysty quqyqbuzýshylyqtardyń aldyn alý, sondai-aq belgilengen zańdy ýaqyttan keiin jasóspirimderdiń ata-anasynsyz nemese zańdy ókilderinsiz qoǵamdyq oryndarda júrýin boldyrmaý.
«Túngi reidter qalalyq quqyq tártibin nyǵaitýǵa yqpal etedi jáne qaýipsiz qala ortasyn qalyptastyrýǵa múmkindik beredi. Bul baǵytta turaqty jumys jas urpaqqa qaýipsiz minez-qulyq mádenietin qalyptastyrýǵa, tártiptilikti arttyrýǵa jáne zańǵa degen qurmetti qalyptastyrýǵa kómektesedi», – dedi Nura aýdany ákimdiginiń ishki saiasat jáne áleýmettik sala bóliminiń bas mamany Rýslan Sabitov.
Reid barysynda iývenaldyq politsiia qyzmetkerleri túngi ýaqytta eresektersiz qoǵamdyq oryndarda júrgen 11 jasóspirimdi anyqtady.
Jasóspirimderdiń zańdy ókilderi QR Ákimshilik quqyq buzýshylyq kodeksiniń 442-babynyń 2-bólimi boiynsha ákimshilik jaýapkershilikke tartyldy.
Aita keteiik, reidter kezinde politsiia qyzmetkerleri aýlalarda, kóshelerde, saiabaqtarda, saýda ortalyqtarynda, demalys jáne oiyn-saýyq oryndarynda patrýl júrgizedi. Arnaiy nazar jasóspirimderdiń eresektersiz kóshede júrýine aýdarylady. Olarǵa jáne olardyń ata-analaryna profilaktikalyq áńgimeler ótkiziledi, ákimshilik quqyqbuzýshylyqtar tirkeledi jáne aldyn alý sharalary júrgiziledi. Anyqtalǵan jasóspirimder zańdy ókilderine tapsyryldy.
