Sport ortalyqtarynyń ashylý rásimine qala ákiminiń orynbasary Baqtiiar Maken, Dene shynyqtyrý jáne sport basqarmasynyń basshysy Samat Erǵaliev jáne qala maslihatynyń depýtattary qatysty.
Qalalyq ákimdik pen QR Boks federatsiiasynyń prezidenti Keńes Raqyshevtiń qoldaýymen elordada tuńǵysh ret ashylǵan boks ortalyǵynda bir ýaqytta 500-den asa adam sportpen shuǵyldana alady. Sondai-aq «Astana-Arena» sport kesheniń janynan ashylǵan ortalyq zamanaýi quraldarmen jabdyqtalyp, júgirý joly da tóselgen.
– Barshańyzdy Ulystyń uly kúni – Naýryz merekesimen jáne búgingi sport ortalyqtarynyń ashylýymen shyn júrekten quttyqtaimyn. Qalamyzda sport ortalyqtarynyń kóptep ashylýy turǵyndarynyń sportpen ainalysýyna jaǵdai jasap, balalar men jasóspirimderdiń, sondai-aq qala quramasynyń halyqaralyq básekelerde joǵary deńgeide óner kórsetýine septigin tigizedi, – dep Baqtiiar Maken óz sózinde atap ótti.
Kórkem gimnastikadan jattyǵý «Dýman» qonaqúiinde, «Aspan» sport kesheninde jáne Nazarbaev ýniversitetinde júrgiziledi, sol siiaqty «Táýelsizdik» saraiynda taǵy bir kórkem gimnastika ortalyǵy ashyldy.
– Ózderińiz kórip turǵandai bul jerge 9 kilem siiady. Osylaisha bir ýaqytta 100 sportshy sportpen ainalysa alady. Barsha jattyqtyrýshylardyń atynan shynaiy alǵysymdy bildiremin. Bizge jasalyp jatqan múmkindikterdiń arqasynda joǵary dárejede óner kórsetip, bairaqty básekelerde elordamyzdyń jáne elimizdiń atyn shyǵarýǵa bar kúsh-jigerimizdi salamyz, – dedi kórkem gimnastikadan №1 BJMORSM-niń aǵa jattyqtyrýshysy Merýert Balǵynbaeva.
Jirentaev kóshesi 6/1 meken jaiynda ashylǵan jekpe-jek zalynyń jalpy aýdany 650 sharshy metrdi quraidy. Atalǵan zalda olimpiadalyq emes 8 sport túri qamtylǵan. Olardyń ishinde: pankration, djiý-djitsý, greppling, sambo, kiokýshinkai-kan karate, shinkiokýshinkai karate, kikboksing jáne qazaq kúresi sekildi sport túrleri bar.
Jańadan ashylǵan jattyǵý zalynyń tárbielenýshileri de qýanyshtaryn jetkizdi.
– Karatege katysyp jýrgenime 6 jyl boldy. Alty jyl ishinde bul sporttan óte jaqsy tárbie, úlken tájirbie aldym. Búgin jańadan zal ashyldy. Bul zal jattyǵý jasaýǵa qolaily, úlken, jaryq eken. Óte qýanyshtymyz, – dedi 11 jasar Dáýlet Túzelhan.
Esterińizge sala keteiik, sport mektepterine qabyldaý ár jyldyń qyrkúiek-qazan ailarynda júrgiziledi. Arnaiy irikteýden ótken balalar Nur-Sultan qalasy ákimdigine qarasty sport mektepterinde sportpen tegin shuǵyldana alady.
