Elordada ashyq aspan astynda kitaphana uiymdastyryldy
Is-shara aiasynda balalar jumysynyń kórmesi men kitap jármeńkesi uiymdastyryldy.
Baiqońyr aýdany ákiminiń orynbasary Erlan Jaýlybaev mundai kórmeler jaz boiy uiymdastyrylatynyn atap ótti.
– Balalarymyzdy búgingi merekemen quttyqtaimyn! Sizderge myqty densaýlyq, oqýda ozattyq tileimin jáne ata-analaryńyzdy kúndelikti qýantyp júrińizder. Al ákimdik atynan «Foliant» baspasyna, qalanyń ortalyqtandyrylǵan kitaphanalaryna kórsetken qoldaýy úshin alǵys bildirgimiz keledi. Kitap kórmeleri jazdyń sońyna deiin ótedi. Sonymen qatar, demalys kúnderi jazýshylarmen kezdesýler ótkiziledi, – dedi Erlan Jaýlybaev.
№8 mektep-litseiiniń bastaýysh synyp muǵalimi Jansaia Muhamedrahym ózimen birge ekinshi synyp oqýshylaryn kórmege ertip keldi. Onyń aitýynsha, mundai is-sharalardyń mańyzy zor.
– Búgingi is-sharaǵa jazǵy mektepte oqityn oqýshylarymyzben keldik. Mereke kúni balalarymyz sergip, oi-órisin keńeitti. Mundai kórmeler balalar úshin óte paidaly dep oilaimyn. Bul olardyń kitap oqýǵa degen qyzyǵýshylyǵyn arttyrady. Osy múmkindikti paidalana otyryp, balalardy merekemen quttyqtap, myqty densaýlyq jáne úlken jetistik tileimin, – dedi ol.
