Astana – Shýchinsk baǵytyndaǵy aqyly tasjoldyń kúnbaǵys alqaptary ornalasqan bóliginde kóligin toqtatyp, sýretke túsken júrgizýshiler ákimshilik jaýapkershilikke tartyldy, dep habarlaidy dalanews.kz.
Aqmola oblysy politsiiasynyń málimetinshe, atalǵan ýchaske joǵary jyldamdyqpen júretin avtoban bolǵandyqtan, onda kólikti toqtatýǵa qatań tyiym salynǵan. Bul talap jol boiyna ornatylǵan arnaiy jol belgileri arqyly aldyn ala eskertilgen.
Soǵan qaramastan, kúnbaǵys gúldegen maýsymda áleýmettik jelige sýret túsirý maqsatynda birqatar júrgizýshi kólikterin ruqsat etilmegen jerge toqtatqan.
Politsiianyń habarlaýynsha, gúldeý kezeńi bastalǵaly beri belgilenbegen jerde toqtaǵany úshin 25 júrgizýshi ákimshilik jaýapkershilikke tartylǵan.
Qoldanystaǵy zańnamaǵa sáikes, mundai quqyq buzýshylyq alǵash ret jasalsa, 3 AEK (12 975 teńge) kóleminde aiyppul salynady. Al bir jyl ishinde bul áreket qaitalansa, aiyppul mólsheri 10 AEK-ke (43 250 teńge) deiin ósedi.
Tártip saqshylary júrgizýshilerge jol qozǵalysy erejelerin qatań saqtap, joǵary jyldamdyqty tasjoldarda óz qaýipsizdigi men ózge jol qozǵalysyna qatysýshylardyń ómirine qaýip tóndirmeýge shaqyrdy.
