Mundai áńgimeniń taralýyna negiz de joq emes edi. Internet paidalanýshylar Svetlana Aitbaevanyń instagramdaǵy paraqshasynan Frantsiianyń birneshe qalasynan sýret júktegenin baiqasa kerek.
Endi mán-jaidy ánshi, oblystyq máslihattyń depýtaty Svetlana Aitbaevanyń óz aýzynan estiik:
– Bizde Aqtóbede Ahmet Jubanov atyndaǵy qazaq halqy aspaptary orkestri bar. Múmkindik týyndap, Frantsiianyń birneshe qalasynda óner kórsetý kerek boldy. Saparymyzdy uiymdastyrýǵa oblys basshysy Berdibek Saparbaevtyń eńbegi sińdi. Óitkeni, úlken ujymnyń shetelge shyǵyp, óner kórsetýi, ainalyp kelgende, qarjyǵa tireledi. Onyń ústine, orkestrdiń akademiialyq ataǵy joq eken. Ondai ataqqa ie bolý úshin shetelde óner kórsetý kerek degen kriterii bar, – deidi Svetlana Aitbaeva «Tilshige» bergen suhbatynda.
Ánshiniń aitýynsha, Ahmet Jubanov atyndaǵy halyq aspaptary orkestriniń ózge memleketke shyǵýyna sońǵy on úsh jylda alǵash ret múmkindik týyndaǵan.
Aqtóbeden barlyǵy 30-dan astam óner adamy 9 kún boiy Frantsiianyń toǵyz qalasynda óner kórsetedi.
– Frantsýzdardy, jalpy atalǵan mádeni sharaǵa qatysýǵa kelgen qonaqtardy da, opera, ariia degenmen tańqaldyra almaisyń. Úlken shyǵarmalar oryndadym dep aita almaimyn. Ol jaqta qazaqtyń halyq ánderin, folklordy tyńdaidy. Ońasha qalǵanda «Qazaqstanda qadiri bolmaǵan «Sáýlem-aidyń» baǵy jandy-aý» dep, ázil-shyny aralas aitqandar da boldy. Ár qalasynda kemi eki-úsh myń kórermenniń aldynda óner kórsettik, – deidi ánshi.
Aqtóbelik ónerpazdar negizgi baǵdarlamadan tys bilim ordalary men áleýmettik nysandarda da kontsert qoiǵan. Árbir kontsertte elimzidiń kók bairaǵy jelbirep turǵan.
– Biraz ter tóktik dep elge maqtanysh sezimmen oralǵanymyzda, jańaǵydai áńgimeni estip, birtúrli bolyp qalǵanymyz ras. Óz basym kishkene renjidim de. Bizde mádenietke, ónerge qoldaý kórsetý degenniń deńgeii solai bolǵany shyǵar. Syrtkózge demalyp júrgen siiaqty bolyp kóringenimizben, bizder úlken eńbek ettik dep oilaimyn. Qazaqtyń ulttyq kóilegimen sahnada turyp, sál qatelessek, ne bolǵany?! Ýaiymdaisyń. Kontsert sońynan kontsert. Daiyndyq jumystary óz aldyna. Frantsiianyń beldi basylymdary bizdiń óner ujymymyz týraly qansha maqala jazdy, — deidi ánshi.
Svetlana Aitbaevanyń aitýynsha, Frantsiiaǵa Dimash barmaǵan.
– Kezinde Dimashqa júldeli oryndy áke-sheshesi tamyr-tanystyqpen alyp bergen ǵoi degen de, aldymen, ózimizdiń adamdar. Balamyz, árine, renjidi. Onymen óner jolynyń ońai emestigin erte sezinip ósken onyń saly sýǵa túspei, kerisinshe, ózge de úlken baiqaýlarda elimizdiń abyroiyn asqaqtatyp júr emes pe?, – deidi ol «Tilshige» bergen jaýabynda.
Ónerli otbasynyń sózge qalýy alǵash emes. Osydan sanaýly jyl buryn otaǵasy Qanat Aitbaev Ǵaziza Jubanova atyndaǵy oblystyq filarmoniiaǵa jetekshilik etedi. Keiin, bir sebeptermen qyzmetten bosaidy.
– Ras, jergilikti basylymdardyń birinde Qanat áieli Sveta men balasy Dimashty qasyna jumysqa alypty degen oi tastapty. Biraq, men ol jerde jiyrma jyldan beri eńbek etip kelemin ǵoi. Jiyrma jyl boiy filarmoniianyń ujymymen óner kórsetip júrmin. Dimash ta ákesi basshylyqqa kelgenshe filarmoniiada jumys jasap júrdi. Endi el aitty dep, osynsha ýaqyt eńbek etken filarmoniiamdy tastap kete almaimyn ǵoi. Jiyrma jyl buryn 30 adam bolyp bastaǵan edik, búginde ujymda 200-den astam adam bar. Joldasym bir jyl direktor bolǵanda sóz erdi eken dep, filarmoniiany tastap kete almaimyn, – deidi Svetlana Aitbaeva.
Ənshi orkestrdiń akademiialyq ataq alsa degen tilegi baryn jasyrmaidy. «Akademik Ahmet Jubanovtyń atyndaǵy ujymǵa mundai artyq bolmas edi» deidi ənshi.
Asqar Aqtileý
