Elimizde óndirilgen júzimniń 72 paiyzy Túrkistan óńirine tiesili
Jalpy júzim sharýashylyǵy 50 jylǵa jýyq ónim beredi eken. Qojalyq basshysy Maharam Niftalievtiń aityp ótkenindei, júzim baqtaryna jumsalǵan shyǵyn aldaǵy 5-6 jylda tolyǵymen aqtalýy tiis.
Biylǵy jyly sharýashylyq júzimdiktiń ár gektarynan 25 tsentnerge deiin ónim alypty. Jalpy alǵanda álemde júzimniń 4000-ǵa jýyq túri bar eken. Jetisai jerinde negizinen alys tasymalǵa shydamdy «Taify» sorty egilipti. Júzimniń bul sorty qazirgi tańda Reseige kóptep jóneltilip jatyr. Onyń bir kelisi – 120-130 teńgeniń tóńireginde saýdalanýda.
Maýsymdyq jumysqa tartylǵan otyz shaqty aýyl turǵyny alqapqa arnaiy kólikpen ákelinedi, túski aspen de qamtylǵan. Eki qolǵa bir kúrek tapqan aýyl turǵyndary da dán riza, – dep jazady Ońtústik Qazaqstan basylymy.
Aýdan ákimdigi mamandarynyń málimdeýinshe, búginde Abai aýyl okrýgindegi júzimdik alqaptyń kólemi 280 gektarǵa jetken. Aýdan boiynsha mundai kólemdi alqap eshbir okrýgte joq. Abaidaǵy júzim jinaý naýqany da aiaqtalyp, diqandar ala jazdai etken eńbeginiń jemisin jeýde.
Aita ketsek jalpy, sońǵy jyldary Túrkistan oblysy boiynsha jemis-jidek pen júzimniń egis kólemi 1,8 myń gektarǵa artyp, 30 myń gektarǵa jetken. Onyń ishinde jemis – 19,5 myń gektar, júzim 10,5 myń gektardy quraidy. Aǵymdaǵy jyly 85 myń tonna jemis-jidek jáne 70 myń tonna júzim jinaý josparlanyp otyr. Bul – respýblikada óndirilgen júzimniń 72,5 paiyzy Túrkistan oblysynyń enshisinde degen sóz.
