Partiianyń baspasóz qyzmeti atap ótkendei, densaýlyq saqtaý – sailaýaldy baǵdarlamanyń mańyzdy bloktarynyń biri, oǵan Sailaýaldy ýádelerdi iske asyrý jónindegi Jol kartasynyń 362 indikatorynyń 23-i arnalǵan.
Máselen, 2023 jylǵa qarai dárigerlerdiń jalaqysyn 2,5 ese arttyryp, densaýlyq saqtaýdy qarjylandyrý kólemin barlyq kózderden eldiń JIÓ-niń 5%-ine deiin jetkizý mindeti qoiylyp otyr.
Otyrys barysynda Keńes músheleri meditsina uiymdarynyń infraqurylymyn óńirlerde, ásirese aýyldyq jerlerde jaqsartýǵa baqylaýdy qamtamasyz etý sharalaryn qarastyrdy.
Ult densaýlyǵy máseleleri jónindegi respýblikalyq qoǵamdyq keńestiń birinshi kezdesýinde ziiandy ónimderge – temeki, alkogol, quramynda qant bar ónimderge aktsizdik salyqtardy arttyrý jáne engizý máselesi de talqylandy.
Keńes múshesi, elimizdiń jetekshi kardiology Qairat Dáýletov atap kórsetkendei, búginde árbir jetinshi ólim alkogolden, al 50 jasqa deiingi erler arasynda árbir úshinshi ólim spirttik ishimdikterdi tutynýmen bailanysty. Temekini tutynýdan jylyna keminde 18 myń qazaqstandyq qaitys bolady.
«Qazaqstan men damyǵan elder arasyndaǵy mezgilsiz ólim-jitimniń úlken aiyrmashylyǵyn da dál osy alkogol men temeki anyqtaidy», – dep málimdedi ol.
Keńes tóraǵasynyń orynbasary Jámilá Sadyqovanyń aitýynsha, Qazaqstanda jarnamalanatyn ónimderdiń 80%-ke jýyǵy – fast-fýd, quramynda qant bar sýsyndar, daiyn tańǵy as jáne t.b.
«Bul ónimderdi belsendi tutyný bizdiń elimizde erlerdiń 19%-i, áielderdiń 23%-i jáne 6 jastan 9 jasqa deiingi balalardyń 20%-i zardap shegetin semizdikke ákelýi múmkin. Semizdiktiń artýynyń tikelei saldary 400 myńnan astam qazaqstandyq aýyryp otyrǵan qant diabeti bolyp tabylady», – dedi ol.
