پارتيانىڭ باسپا ءسوز قىزمەتى اتاپ وتكەندەي، دەنساۋلىق ساقتاۋ – سايلاۋالدى باعدارلامانىڭ ماڭىزدى بلوكتارىنىڭ ءبىرى، وعان سايلاۋالدى ۋادەلەردى ىسكە اسىرۋ جونىندەگى جول كارتاسىنىڭ 362 ينديكاتورىنىڭ 23ء-ى ارنالعان.
ماسەلەن، 2023 جىلعا قاراي دارىگەرلەردىڭ جالاقىسىن 2،5 ەسە ارتتىرىپ، دەنساۋلىق ساقتاۋدى قارجىلاندىرۋ كولەمىن بارلىق كوزدەردەن ەلدىڭ ءجىو-نىڭ 5%-ىنە دەيىن جەتكىزۋ مىندەتى قويىلىپ وتىر.
وتىرىس بارىسىندا كەڭەس مۇشەلەرى مەديسينا ۇيىمدارىنىڭ ينفراقۇرىلىمىن وڭىرلەردە، اسىرەسە اۋىلدىق جەرلەردە جاقسارتۋعا باقىلاۋدى قامتاماسىز ەتۋ شارالارىن قاراستىردى.
سونىمەن قاتار، كەڭەس مۇشەلەرى مەديسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋ ماسەلەسىن كوتەردى. اتاپ ايتقاندا، كەڭەس مۇشەسى ەلميرا الييەۆا مەديسينالىق قىزمەتكەردىڭ قۇقىقتارى جونىندەگى ۋاكىل ينستيتۋتىن قۇرۋدى ۇسىندى. ءوز كەزەگىندە دەنساۋلىق ساقتاۋ ۆيسە-مينيسترى اجار عينيات مەديسينا قىزمەتكەرلەرىنىڭ جاۋاپكەرشىلىگىن ساقتاندىرۋ جۇيەسىن ەنگىزۋ جونىندەگى زاڭنامالىق نورمالار ازىرلەنىپ جاتقانىن حابارلاپ، ولاردى كەڭەستىڭ كەلەسى وتىرىسىنا تالقىلاۋعا ەنگىزۋدى ۇسىندى.
ۇلت دەنساۋلىعى ماسەلەلەرى جونىندەگى رەسپۋبليكالىق قوعامدىق كەڭەستىڭ ءبىرىنشى كەزدەسۋىندە زياندى ونىمدەرگە – تەمەكى، الكوگول، قۇرامىندا قانت بار ونىمدەرگە اكسيزدىك سالىقتاردى ارتتىرۋ جانە ەنگىزۋ ماسەلەسى دە تالقىلاندى.
كەڭەس مۇشەسى، ەلىمىزدىڭ جەتەكشى كارديولوگى قايرات داۋلەتوۆ اتاپ كورسەتكەندەي، بۇگىندە ءاربىر جەتىنشى ءولىم الكوگولدەن، ال 50 جاسقا دەيىنگى ەرلەر اراسىندا ءاربىر ءۇشىنشى ءولىم سپيرتتىك ىشىمدىكتەردى تۇتىنۋمەن بايلانىستى. تەمەكىنى تۇتىنۋدان جىلىنا كەمىندە 18 مىڭ قازاقستاندىق قايتىس بولادى.
«قازاقستان مەن دامىعان ەلدەر اراسىنداعى مەزگىلسىز ءولىم-جىتىمنىڭ ۇلكەن ايىرماشىلىعىن دا ءدال وسى الكوگول مەن تەمەكى انىقتايدى»، – دەپ مالىمدەدى ول.
كەڭەس ءتوراعاسىنىڭ ورىنباسارى ءجاميلا سادىقوۆانىڭ ايتۋىنشا، قازاقستاندا جارنامالاناتىن ونىمدەردىڭ 80%-كە جۋىعى – فاست-فۋد، قۇرامىندا قانت بار سۋسىندار، دايىن تاڭعى اس جانە ت.ب.
«بۇل ونىمدەردى بەلسەندى تۇتىنۋ ءبىزدىڭ ەلىمىزدە ەرلەردىڭ 19%ء-ى، ايەلدەردىڭ 23%ء-ى جانە 6 جاستان 9 جاسقا دەيىنگى بالالاردىڭ 20%ء-ى زارداپ شەگەتىن سەمىزدىككە اكەلۋى مۇمكىن. سەمىزدىكتىڭ ارتۋىنىڭ تىكەلەي سالدارى 400 مىڭنان استام قازاقستاندىق اۋىرىپ وتىرعان قانت ديابەتى بولىپ تابىلادى»، – دەدى ول.
