Eńbek jáne halyqty áleýmettik qorǵaý ministri Svetlana Jaqypova biryńǵai ýaqyt beldeýine bailanysty jumys ýaqytynyń ózgerýi múmkin ekenin aitty, dep habarlaidy Dalanews.kz.
Jýrnalister elimizdiń birqatar óńirinde ýaqyt beldeýiniń aýysýyna bailanysty áleýmettik jelide jumys ýaqytyn bir saǵatqa erte bastaýǵa qatysty usynystar túsip jatqanyn, buǵan Eńbek ministrliginiń jospary qandai ekenin surady.
"Bizge kóp hat kelip jatyr, olardyń bárine jaýap beremiz. Jumys berýshi men jumysshynyń arasynda kelisimshart bar, jumys kestesin eki jaq birge jasaidy. Sondyqtan qarańǵyda jumys istemeýi úshin, jumys berýshimen kelisip, jumys kestesin qaita qarai alady. Negizi bul kúrdeli suraq emes.
Usynys berdik, iaǵni jumys bir saǵatqa erte bastalýy múmkin. Negizi kelisimshart ekijaqty jasalady. Ol Eńbek kodeksinde jazylǵan, zańǵa sáikes", - dedi dep jaýap berdi Svetlana Jaqypova.
Buǵan deiin elimizde burynǵy saǵat beldeýin qaitarý týraly petitsiia 50 myń qol jinaǵany belgili bolǵan edi. Bul máseleni Saýda jáne integratsiia ministrligi qaraýy qajet.
Eske salaiyq, 2024 jyly 29 aqpannan 1 naýryzǵa qaraǵan túni Úkimettiń "Qazaqstan Respýblikasynyń aýmaǵynda ýaqytty esepteý tártibi týraly" Qaýlysyna sáikes eldiń búkil aýmaǵy biryńǵai saǵattyq beldeýge kóshti. Sodan beri Qazaqstannyń 16 oblysy 5 saǵattyq "UTC+5" beldeýinde ornalasty. Alaida budan keiin saǵat tilin keri jyljytý týraly petitsiia paida boldy.
Buǵan deiin premer-ministrdiń orynbasary Serik Jumanǵarin petitsiia 50 myń daýys jinaǵanda qandai sheshim qabyldanatyny týraly saýalǵa jaýap bergen edi.
"Petitsiia 50 myń daýys jinasa, biz arnaiy jumys tobyn quryp, belgilengen tártipte memlekettik organdar men sarapshylardy tarta otyryp, ony qaraityn bolamyz. Men qazir aldyn ala eshteńe aita almaimyn. Onyń 50 myń daýys jinaǵanyn kúteiik", - dedi ol.
