ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ءبىرىڭعاي ۋاقىت بەلدەۋىنە بايلانىستى جۇمىس ۋاقىتىنىڭ وزگەرۋى مۇمكىن ەكەنىن ايتتى، دەپ حابارلايدى Dalanews.kz.
جۋرناليستەر ەلىمىزدىڭ ءبىرقاتار وڭىرىندە ۋاقىت بەلدەۋىنىڭ اۋىسۋىنا بايلانىستى الەۋمەتتىك جەلىدە جۇمىس ۋاقىتىن ءبىر ساعاتقا ەرتە باستاۋعا قاتىستى ۇسىنىستار ءتۇسىپ جاتقانىن، بۇعان ەڭبەك مينيسترلىگىنىڭ جوسپارى قانداي ەكەنىن سۇرادى.
"بىزگە كوپ حات كەلىپ جاتىر، ولاردىڭ بارىنە جاۋاپ بەرەمىز. جۇمىس بەرۋشى مەن جۇمىسشىنىڭ اراسىندا كەلىسىمشارت بار، جۇمىس كەستەسىن ەكى جاق بىرگە جاسايدى. سوندىقتان قاراڭعىدا جۇمىس ىستەمەۋى ءۇشىن، جۇمىس بەرۋشىمەن كەلىسىپ، جۇمىس كەستەسىن قايتا قاراي الادى. نەگىزى بۇل كۇردەلى سۇراق ەمەس.
ۇسىنىس بەردىك، ياعني جۇمىس ءبىر ساعاتقا ەرتە باستالۋى مۇمكىن. نەگىزى كەلىسىمشارت ەكىجاقتى جاسالادى. ول ەڭبەك كودەكسىندە جازىلعان، زاڭعا سايكەس"، - دەدى دەپ جاۋاپ بەردى سۆەتلانا جاقىپوۆا.
بۇعان دەيىن ەلىمىزدە بۇرىنعى ساعات بەلدەۋىن قايتارۋ تۋرالى پەتيسيا 50 مىڭ قول جيناعانى بەلگىلى بولعان ەدى. بۇل ماسەلەنى ساۋدا جانە ينتەگراسيا مينيسترلىگى قاراۋى قاجەت.
ەسكە سالايىق، 2024 جىلى 29 اقپاننان 1 ناۋرىزعا قاراعان ءتۇنى ۇكىمەتتىڭ "قازاقستان رەسپۋبليكاسىنىڭ اۋماعىندا ۋاقىتتى ەسەپتەۋ ءتارتىبى تۋرالى" قاۋلىسىنا سايكەس ەلدىڭ بۇكىل اۋماعى ءبىرىڭعاي ساعاتتىق بەلدەۋگە كوشتى. سودان بەرى قازاقستاننىڭ 16 وبلىسى 5 ساعاتتىق "UTC+5" بەلدەۋىندە ورنالاستى. الايدا بۇدان كەيىن ساعات ءتىلىن كەرى جىلجىتۋ تۋرالى پەتيسيا پايدا بولدى.
بۇعان دەيىن پرەمەر-مينيستردىڭ ورىنباسارى سەرىك جۇمانعارين پەتيسيا 50 مىڭ داۋىس جيناعاندا قانداي شەشىم قابىلداناتىنى تۋرالى ساۋالعا جاۋاپ بەرگەن ەدى.
"پەتيسيا 50 مىڭ داۋىس جيناسا، ءبىز ارنايى جۇمىس توبىن قۇرىپ، بەلگىلەنگەن تارتىپتە مەملەكەتتىك ورگاندار مەن ساراپشىلاردى تارتا وتىرىپ، ونى قارايتىن بولامىز. مەن ءقازىر الدىن الا ەشتەڭە ايتا المايمىن. ونىڭ 50 مىڭ داۋىس جيناعانىن كۇتەيىك"، - دەدى ول.
