QR Ǵylym jáne joǵary bilim vitse-ministri Talǵat Eshenqulov 2025 jylǵy 20 mamyrda Úkimet otyrysynda jasaǵan baiandamasynda 1 qyrkúiekten bastap stýdentterdiń shákirtaqysynyń kólemi ósetinin aitty, dep habarlaidy Dalanews.kz.
Onyń aitýynsha, shákirtaqy mólsheri:
- bakalavriattaǵylar úshin 52 372 teńge,
- magistratýradaǵylar úshin 117 098 teńge,
- doktorantýraǵylar úshin 262 500 teńge bolyp belgilenedi.
Vitse-ministr túsindirip ótkendei, bakalavriat deńgeiindegi shákirtaqy mólsheri 2020 jylmen salystyrǵanda eki esege, al magistratýra men doktorantýra deńgeiinde 1,75 esege ulǵaimaq.
Onyń aitýynsha, qazirgi ýaqytta respýblikada 122 joǵary oqý orny, onyń ishinde 10 zertteý joǵary oqý orny jáne 23 filial jumys isteidi. 2024-2025 oqý jylynda azamattyq joǵary oqý oryndarynda 680 myńnan astam stýdent oqidy, onyń ishinde 624,5 myńy bakalavriatta, 39,2 myńy magistratýrada, 7,6 myńy doktorantýrada jáne 8,9 myńy rezidentýrada bilim alýda.
"Infraqurylymdyq jobalar boiynsha jumystar da belsendi júrgizilýde. Búgingi tańda jataqhanalardaǵy oryn tapshylyǵy 2019 jylǵy 82 500-den 2024 jyly 14 873 tósek-orynǵa deiin qysqardy. Erekshe bilim berý qajettiligi bar balalar úshin jataqhanalarda oryn berý jónindegi memlekettik qyzmet proaktivti formatta usynylatynyn da basa aita ketkim keledi", - dedi Talǵat Eshenqulov.
