Nursultan Nazarbaev Prezıdent kómekshisi – Qaýipsizdik Keńesiniń Hatshysy Áset Isekeshevti qabyldady. Kezdesý barysynda Elbasy Qaýipsizdik Keńesi elimizdiń ulttyq qaýipsizdigi men qorǵanys qabiletin qamtamasyz etýde biryńǵaı memlekettik saıasatty iske asyrýdy úılestirýde mańyzdy ról atqaratynyn atap ótti, – dep habarlaıdy elbasy.kz.

– Qaýipsizdik Keńesi eldiń ishinde de, odan tysqary da qaýipsizdik máselelerin taldaıtyn jáne qaraýǵa usynatyn óte mańyzdy memlekettik organ. Onyń quzyryna quqyq qorǵaý organdarynyń jumysy, azyq-túlik qaýipsizdigin qamtamasyz etý, shet eldermen qarym-qatynas jáne eldiń qorǵanys qabileti sıaqty máseleler kiredi. Sonymen birge, quqyq qorǵaý júıesiniń reformasyna kóńil bólip, sońyna deıin jetkizý mańyzdy, – dedi Qazaqstannyń Tuńǵysh Prezıdenti.

Óz kezeginde Á.Isekeshev eldegi qazirgi jaǵdaı týraly baıandap, 2020 jylǵa arnalǵan jumys jospary týraly aqparat usyndy. Kezdesý qorytyndysy boıynsha Qaýipsizdik Keńesiniń Tóraǵasy birqatar naqty tapsyrma berdi.