Elbasy Din isteri ministrin qabyldady
Ministr Ermekbaev Prezidentke dini qyzmet salasyndaǵy jumystardyń nátijeleri týraly baiandady.
Kezdesýde Elbasyǵa azamattyq qoǵamdaǵy qazirgi jaǵdai men din salasyndaǵy memlekettik saiasatty iske asyrý úshin qabyldanyp jatqan sharalar jóninde málimet usynyldy.
Prezident ministrliktiń jahandyq jáne óńirlik búgingi syn-qaterler aiasynda atqaryp otyrǵan jumystarynyń ózektiligin erekshe atap ótti.
– Ministrlik qurylǵaly birshama ýaqyt ótti. Qazirgi jaǵdaida ministrlikterińizdiń jumysy elimiz úshin asa mańyzdy, – dedi Nursultan Nazarbaev.
Din isteri jáne azamattyq qoǵam ministri Qazaqstan Prezidentine dini qyzmet salasyndaǵy memlekettik saiasatty júrgizý, memlekettik jastar saiasatyn iske asyrý, sondai-aq volonterlermen jáne úkimettik emes uiymdarmen ózara is-qimyl jasaý jónindegi jumystardyń nátijeleri týraly baiandady.
Elbasy kezdesý qorytyndysy boiynsha birqatar naqty tapsyrma berdi.
Nursultan Nazarbaev, Qazaqstan Respýblikasynyń Prezidenti:
– Jańa ministrlik qurylǵaly birshama ýaqyt ótti. Qazirgi jaǵdaida ministrlikterińizdiń jumysy elimiz úshin asa mańyzdy, istep jatqan sharalar úshin, saiasi baqylaý úshin jáne ishki jaǵdaidy turaqtandyrý úshin, halyqqa túsindirý úshin. Bizdiń júrgizip jatqan saiasat – barlyq dinge birdei qaraý. Sol jaiynda qandai jumystar jasalyp jatqanyn baiandaýǵa shaqyrdym.
Nurlan Ermekbaev, QR Din isteri jáne azamattyq qoǵam ministri:
– Asa qurmetti Nursultan Ábishuly! Sizdiń jarlyǵyńyzben ministrlik 1 jyl jumys istedi. Úsh basty baǵyt bekitildi. Olar: din salasy, azamattyq qoǵammen ózara árekettesý, memlekettik jastar saiasatyn iske asyrý, sondai-aq volonterlermen jáne úkimettik emes uiymdarmen ózara is-qimyldy úilestirý. «Rýhani jańǵyrý» baǵdarlamasy aiasynda 2 jobany júzege asyrý jáne qaiyrymdylyq qyzmetin úilestirý. Jalpy aitqanda, qoǵamymyzda osy 3 baǵyttaǵy memlekettik saiasatty halyqtyń qoldaý deńgeii joǵary. Iaǵni, din salasynda 87% memlekettiń saiasatyn qoldaidy. Azamattyq qoǵammen ózara árekettesý salasynda – 60%-y, al jastar saiasatynda 75%-y memlekettiń saiasatyn qoldap otyr.
