قازاقستان پرەزيدەنتى ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆتى قابىلدادى، دەپ حابارلايدى اقوردانىڭ باسپا ءسوز قىزمەتى.

مينيستر ەرمەكبايەۆ پرەزيدەنتكە ءدىني قىزمەت سالاسىنداعى جۇمىستاردىڭ ناتيجەلەرى تۋرالى باياندادى.

كەزدەسۋدە ەلباسىعا ازاماتتىق قوعامداعى قازىرگى جاعداي مەن ءدىن سالاسىنداعى مەملەكەتتىك ساياساتتى ىسكە اسىرۋ ءۇشىن قابىلدانىپ جاتقان شارالار جونىندە مالىمەت ۇسىنىلدى.

پرەزيدەنت مينيسترلىكتىڭ جاھاندىق جانە وڭىرلىك بۇگىنگى سىن-قاتەرلەر اياسىندا اتقارىپ وتىرعان جۇمىستارىنىڭ وزەكتىلىگىن ەرەكشە اتاپ ءوتتى.

– مينيسترلىك قۇرىلعالى ءبىرشاما ۋاقىت ءوتتى. قازىرگى جاعدايدا مينيسترلىكتەرىڭىزدىڭ جۇمىسى ەلىمىز ءۇشىن اسا ماڭىزدى، – دەدى نۇرسۇلتان نازاربايەۆ.

ءدىن ىستەرى جانە ازاماتتىق قوعام ءمينيسترى قازاقستان پرەزيدەنتىنە ءدىني قىزمەت سالاسىنداعى مەملەكەتتىك ساياساتتى جۇرگىزۋ، مەملەكەتتىك جاستار ساياساتىن ىسكە اسىرۋ، سونداي-اق ۆولونتەرلەرمەن جانە ۇكىمەتتىك ەمەس ۇيىمدارمەن ءوزارا ءىس-قيمىل جاساۋ جونىندەگى جۇمىستاردىڭ ناتيجەلەرى تۋرالى باياندادى.

ەلباسى كەزدەسۋ قورىتىندىسى بويىنشا ءبىرقاتار ناقتى تاپسىرما بەردى.

نۇرسۇلتان نازاربايەۆ، قازاقستان رەسپۋبليكاسىنىڭ پرەزيدەنتى:

– جاڭا مينيسترلىك قۇرىلعالى ءبىرشاما ۋاقىت ءوتتى. قازىرگى جاعدايدا مينيسترلىكتەرىڭىزدىڭ جۇمىسى ەلىمىز ءۇشىن اسا ماڭىزدى، ىستەپ جاتقان شارالار ءۇشىن، ساياسي باقىلاۋ ءۇشىن جانە ىشكى جاعدايدى تۇراقتاندىرۋ ءۇشىن، حالىققا ءتۇسىندىرۋ ءۇشىن. ءبىزدىڭ جۇرگىزىپ جاتقان ساياسات – بارلىق دىنگە بىردەي قاراۋ. سول جايىندا قانداي جۇمىستار جاسالىپ جاتقانىن بايانداۋعا شاقىردىم.

نۇرلان ەرمەكبايەۆ، ق ر ءدىن ىستەرى جانە ازاماتتىق قوعام ءمينيسترى:

– اسا قۇرمەتتى نۇرسۇلتان ءابىش ۇلى! ءسىزدىڭ جارلىعىڭىزبەن مينيسترلىك 1 جىل جۇمىس ىستەدى. ءۇش باستى باعىت بەكىتىلدى. ولار: ءدىن سالاسى، ازاماتتىق قوعاممەن ءوزارا ارەكەتتەسۋ، مەملەكەتتىك جاستار ساياساتىن ىسكە اسىرۋ، سونداي-اق ۆولونتەرلەرمەن جانە ۇكىمەتتىك ەمەس ۇيىمدارمەن ءوزارا ءىس-قيمىلدى ۇيلەستىرۋ. «رۋحاني جاڭعىرۋ» باعدارلاماسى اياسىندا 2 جوبانى جۇزەگە اسىرۋ جانە قايىرىمدىلىق قىزمەتىن ۇيلەستىرۋ. جالپى ايتقاندا، قوعامىمىزدا وسى 3 باعىتتاعى مەملەكەتتىك ساياساتتى حالىقتىڭ قولداۋ دەڭگەيى جوعارى. ياعني، ءدىن سالاسىندا 87% مەملەكەتتىڭ ساياساتىن قولدايدى. ازاماتتىق قوعاممەن ءوزارا ارەكەتتەسۋ سالاسىندا – 60%-ى، ال جاستار ساياساتىندا 75%-ى مەملەكەتتىڭ ساياساتىن قولداپ وتىر.