Bas prokýratýranyń burynǵy qyzmetkerleri Baýyrjan Ǵabbasov jáne Olesia Keksel ózderi júrgizgen tergeý isi boiynsha kúdiktini azaptaǵan dep kúdiktelýde.
"Vremia" gazeti habarlaǵandai bulai dep ázir tergelip jatqan eks-energetika vitse-ministri Anatolii Shkarýpanyń advokaty Hamida Aitqalieva málimdegen.
Onyń aitýynsha Olesia Kekselden ázir kýáger retinde jaýap alynǵan, ol qorǵaýshynyń kómegine júgine alady.
Aita ketsek, buǵan deiin Keksel Bas prokýratýranyń Arnaiy prokýrorlar qyzmetin basqardy, oǵan deiin Jemqorlyqqa qarsy ulttyq biýro tergeý departamenti basshysynyń orynbasary boldy.
Eks-premer Serik Ahmetov jáne eks-ekonomika ministri Qýandyq Bishimbaevqa qatysty qylmystyq iste tergeý tobyna jetekshilik etken de osy - Keksel.
"Ahmetov pen Bishimbaev isi onyń mansabynyń ósýine baspaldaq boldy", – dep jazady kz.expert.
Forbes dereginshe Keksel burynǵy Bas prokýror Qairat Qojamjarovtyń adamy. Prezident buiryǵymen Qojamjarov senator bolǵannan keiin Keksel Qazaqstannan Germaniiaǵa qonys aýdarǵan jáne sonda birjolata turaqtaǵan.
"Ǵabbasov pen Kekseldiń tergelýine qorǵaýymdaǵy kásipker E.I.Nábievtiń aryzy túrtki boldy" - deidi advokat Aitqalieva. Ol sottan tergeý kezinde azap kórgen Nábievti aqtaýdy suraidy.
Buǵan deiin ózge qylmystyq istiń advokaty Jan Kúnserkin arnaiy prokýrorlar qyzmetine jetekshilik etken tusta Olesia Kekseldiń kúdikti Gúlnár Musabaevadan Imanǵali Tasmaǵambetovke qarsy kýálik etýdi talap etkenin málimdegen.
Keksel qyzmetinen ketý týraly aryzdy mamyr aiynda jazǵan. "Vremia" gazetiniń málimetinshe Qojamjarovtyń basqa qyzmetke aýysary belgili bolǵanda Bas prokýratýranyń 100 tarta qyzmetkeri jumystan ketý týraly aryz jazǵan.
Onyń ornyna kelgen Ǵizat Nurdáýletov vedomstvany Qojamjarovtyń kadrlarynan "tazartyp", prokýratýradaǵy birqatar basqarmany qaita qurylymdaǵan. Atap aitqanda Keksel basshylyq etken Arnaiy prokýrorlar qyzmetin taratyp jibergen.
Keksel Tasmaǵambetovke qarsy kýálik etýdi talap etken Gúlnár Musabaeva ǵaryshker Talǵat Musabaevtyń týysy. 2016 jyly onyń ústinen QazKomBankten zańsyz jolmen qaitarymsyz nesie aldy degen aiyppen is qozǵalady.
Musabaevanyń qorǵaýshysy Jan Kúnserkin bul is qazir tergelý ústindegi Olesia Kekseldiń baqylaýynda bolǵan deidi.
Keksel Musabaevadan eldegi tanymal tulǵalarǵa, onyń ishinde Qazaqstannyń Reseidegi elshisi Tasmaǵambetovqa qarsy kýálik etýdi talap etip, qysymǵa alǵan.
"Biz onyń Germaniiaǵa ne sebepti ketkenin jáne bizdiń argýmentimizge qarsy ne aitaryn bilgimiz keledi", – deidi Musabaevanyń advokaty.
"Kekseldiń elden ketkeni tegin emes. Ol ózine tyqyr taianǵanyn sezdi. Qazaqstanda qalǵysy kelmedi. Onyń shetelge shyǵýyna shekteý qoiylmaýyn bul daýǵa úshinshi taraptyń aralasqanyn ańǵartady", – deidi óz kezeginde kz.expert.
Al Qazkomnan qaitarymsyz qomaqty nesie alǵan Gúlnár Musabaeva ótken aida bostandyqqa shyqty.
