باس پروكۋراتۋرانىڭ بۇرىنعى قىزمەتكەرلەرى باۋىرجان عابباسوۆ جانە ولەسيا كەكسەل وزدەرى جۇرگىزگەن تەرگەۋ ءىسى بويىنشا كۇدىكتىنى ازاپتاعان دەپ كۇدىكتەلۋدە.
"ۆرەميا" گازەتى حابارلاعانداي بۇلاي دەپ ءازىر تەرگەلىپ جاتقان ەكس-ەنەرگەتيكا ۆيسە-مينيسترى اناتوليي شكارۋپانىڭ ادۆوكاتى حاميدا ايتقالييەۆا مالىمدەگەن.
ونىڭ ايتۋىنشا ولەسيا كەكسەلدەن ءازىر كۋاگەر رەتىندە جاۋاپ الىنعان، ول قورعاۋشىنىڭ كومەگىنە جۇگىنە الادى.
ايتا كەتسەك، بۇعان دەيىن كەكسەل باس پروكۋراتۋرانىڭ ارنايى پروكۋرورلار قىزمەتىن باسقاردى، وعان دەيىن جەمقورلىققا قارسى ۇلتتىق بيۋرو تەرگەۋ دەپارتامەنتى باسشىسىنىڭ ورىنباسارى بولدى.
ەكس-پرەمەر سەرىك احمەتوۆ جانە ەكس-ەكونوميكا ءمينيسترى قۋاندىق بيشىمبايەۆقا قاتىستى قىلمىستىق ىستە تەرگەۋ توبىنا جەتەكشىلىك ەتكەن دە وسى - كەكسەل.
"احمەتوۆ پەن بيشىمبايەۆ ءىسى ونىڭ مانسابىنىڭ وسۋىنە باسپالداق بولدى"، – دەپ جازادى kz.expert.
Forbes دەرەگىنشە كەكسەل بۇرىنعى باس پروكۋرور قايرات قوجامجاروۆتىڭ ادامى. پرەزيدەنت بۇيرىعىمەن قوجامجاروۆ سەناتور بولعاننان كەيىن كەكسەل قازاقستاننان گەرمانياعا قونىس اۋدارعان جانە سوندا ءبىرجولاتا تۇراقتاعان.
"عابباسوۆ پەن كەكسەلدىڭ تەرگەلۋىنە قورعاۋىمداعى كاسىپكەر ە.ي.نابييەۆتىڭ ارىزى تۇرتكى بولدى" - دەيدى ادۆوكات ايتقالييەۆا. ول سوتتان تەرگەۋ كەزىندە ازاپ كورگەن نابييەۆتى اقتاۋدى سۇرايدى.
بۇعان دەيىن وزگە قىلمىستىق ءىستىڭ ادۆوكاتى جان كۇنسەركين ارنايى پروكۋرورلار قىزمەتىنە جەتەكشىلىك ەتكەن تۇستا ولەسيا كەكسەلدىڭ كۇدىكتى گۇلنار مۇسابايەۆادان يمانعالي تاسماعامبەتوۆكە قارسى كۋالىك ەتۋدى تالاپ ەتكەنىن مالىمدەگەن.
كەكسەل قىزمەتىنەن كەتۋ تۋرالى ارىزدى مامىر ايىندا جازعان. "ۆرەميا" گازەتىنىڭ مالىمەتىنشە قوجامجاروۆتىڭ باسقا قىزمەتكە اۋىسارى بەلگىلى بولعاندا باس پروكۋراتۋرانىڭ 100 تارتا قىزمەتكەرى جۇمىستان كەتۋ تۋرالى ارىز جازعان.
ونىڭ ورنىنا كەلگەن عيزات نۇرداۋلەتوۆ ۆەدومستۆانى قوجامجاروۆتىڭ كادرلارىنان "تازارتىپ"، پروكۋراتۋراداعى ءبىرقاتار باسقارمانى قايتا قۇرىلىمداعان. اتاپ ايتقاندا كەكسەل باسشىلىق ەتكەن ارنايى پروكۋرورلار قىزمەتىن تاراتىپ جىبەرگەن.
كەكسەل تاسماعامبەتوۆكە قارسى كۋالىك ەتۋدى تالاپ ەتكەن گۇلنار مۇسابايەۆا عارىشكەر تالعات مۇسابايەۆتىڭ تۋىسى. 2016 جىلى ونىڭ ۇستىنەن قازكومبانكتەن زاڭسىز جولمەن قايتارىمسىز نەسيە الدى دەگەن ايىپپەن ءىس قوزعالادى.
مۇسابايەۆانىڭ قورعاۋشىسى جان كۇنسەركين بۇل ءىس ءقازىر تەرگەلۋ ۇستىندەگى ولەسيا كەكسەلدىڭ باقىلاۋىندا بولعان دەيدى.
كەكسەل مۇسابايەۆادان ەلدەگى تانىمال تۇلعالارعا، ونىڭ ىشىندە قازاقستاننىڭ رەسەيدەگى ەلشىسى تاسماعامبەتوۆقا قارسى كۋالىك ەتۋدى تالاپ ەتىپ، قىسىمعا العان.
"ءبىز ونىڭ گەرمانياعا نە سەبەپتى كەتكەنىن جانە ءبىزدىڭ ارگۋمەنتىمىزگە قارسى نە ايتارىن بىلگىمىز كەلەدى"، – دەيدى مۇسابايەۆانىڭ ادۆوكاتى.
"كەكسەلدىڭ ەلدەن كەتكەنى تەگىن ەمەس. ول وزىنە تىقىر تايانعانىن سەزدى. قازاقستاندا قالعىسى كەلمەدى. ونىڭ شەتەلگە شىعۋىنا شەكتەۋ قويىلماۋىن بۇل داۋعا ءۇشىنشى تاراپتىڭ ارالاسقانىن اڭعارتادى"، – دەيدى ءوز كەزەگىندە kz.expert.
ال قازكومنان قايتارىمسىز قوماقتى نەسيە العان گۇلنار مۇسابايەۆا وتكەن ايدا بوستاندىققا شىقتى.
