"Kenjehan" bazarynyń negizin qalaýshy Qýanysh Jańbyrbaev eks-prezident Nursultan Nazarbaevtyń qaryndasy Ánipa Nazarbaeva bazardy ádeii bankrot jasady dep aiyptady, - dep habarlaidy Dalanews.kz Orda.kz-ke siltep.
"Eski Qazaqstannyń qurbandary" qozǵalysynyń baspasóz konferentsiiasynda Qýanysh Jańbyrbaev bazar salý týraly sheshimdi 1997 jyly qabyldaǵanyn aitady. Buǵan deiin 1950 jyldan beri bazardyń ornynda qoqys jatqan. Keiin ol jer tazalanyp, saýda ortalyǵy ashylyp, kompaniia "Sultan Qorǵan" JShS retinde tirkelgen.
Biraq yqpaldy adamdardyń qoldaýynsyz jáne quqyq qorǵaý organdarynyń maquldaýynsyz bul jobany qolǵa alý múmkin bolmaǵan. Osylaisha bazar quryltaishylarynyń quramynda Ánipa Nazarbaeva paida bolǵan. Bazardyń 30 paiyz úlesi Nazarbaevaǵa tiesili bolǵan. Bastapqyda eshqandai janjalsyz jumys istep júrgen quryltaishylardyń arasynda birneshe jyldan soń problemalar týyndai bastaǵan.
Kompaniianyń basqa músheleriniń sózinshe, 2002 jyly Ánipa Nazarbaeva kompaniiany ádeii bankrottyqqa ushyratqan. Onyń burynǵy seriktesteriniń aitýynsha, ol naryqty óz qolyna alyp, ony aldyn ala tirkelgen "Kenjehan" JShS-ne qaita resimdep alǵan.
Bankrottyq kezinde "Sultan Qorǵan" JShS quny 41 myń teńgege baǵalanǵan, al ekonomikalyq saraptama boiynsha quryltaishylar bazardy salýǵa 44,9 million teńge jumsaǵan.
"Ernat Sybanqulov (sol kezdegi Medeý aýdany prokýrorynyń kómekshisi) kelip, jalǵan kelisim jasap, kompaniianyń 50 paiyzyn Ánipa Nazarbaevaǵa, qalǵan 50 paiyzyn ózime qaldyrýdy usyndy. Men bas tarttym. Sóitip ol (Nazarbaeva) jańa "Kenjehan" JShS quryp, "Sultan Qorǵandy" bankrot jasap, kompaniianyń jalǵyz quryltaishysy bolyp qaldy. Biz aryz jazdyq, qylmystyq is qozǵaldy", - deidi Jańbyrbaev.
Qazirgi tańda Qýanysh Jańbyrbaev sol kezdegi jaǵdaiǵa qatysty tergeý ádil ótkenin qalap otyr. Biraq, bazardyń negizin qalaýshy azamattyń sózinshe, tergeý áli júrmei jatyr - sebebi iske Ernat Sybanqulovtyń qatysy bar. Ol prokýrordyń kómekshisi qyzmetinen keiin elimizdiń Bas kólik prokýrory qyzmetine deiin jetken. Sybanqulov 2022 jyly Qańtar oqiǵasynan keiin qyzmetinen ketkenimen Bas prokýratýradaǵy yqpaly áli de joǵary kórinedi.
Qazirgi tańda bazar basshylyǵy aýysyp ketken. 2022 jyldyń naýryzynda Ánipa Nazarbaeva "Kenjehan" bazaryn satyp alý-satý shartyn úsh jylǵa bólip-bólip tóleýmen 640 mln teńgege kelisim jasasty. Osylatssha "Kenjehannyń" 99 paiyzy "Mitra konsalting" JShS qolyna ótedi. Bul kompaniianyń benefitsiary Nazarbaevtar áýletimen bailanysy bar Sergei Kim.
2023 jyldyń sáýir aiynda sotqa deiingi tergeý organy Jańbyrbaevtyń ótinishi boiynsha qylmystyq isti toqtatqan. Qarasha aiynda bazardyń negizin qalaýshy bul sheshimge shaǵymdandy, biraq segiz kúnnen keiin Alataý aýdanynyń prokýratýrasy oǵan shaǵymdy qanaǵattandyrýdan bas tartqan. Qazir qoǵamdyq belsendiler sotqa deiingi tergeýdi toqtatý týraly sheshimniń kúshin joiýǵa jáne "Kenjehannyń" isin muqiiat qaraýǵa shaqyrady.
