Qorǵanys ministri qyzmetinen ketken Rýslan Jaqsylyqov jańa laýazymǵa taǵaiyndaldy. Endi ol Qazaqstan Qaýipsizdik keńesi hatshysynyń birinshi orynbasary mindetin atqarady, dep habarlaidy Dalanews.kz.
Memleket basshysy Qasym-Jomart Toqaev Rýslan Jaqsylyqovty osy qyzmetke taǵaiyndaý týraly ókimge qol qoidy.
Eske salaiyq, 8 maýsymda Rýslan Jaqsylyqov qorǵanys ministri laýazymynan bosatylǵan edi. Onyń ornyna Dáýren Qosanov kelgen bolatyn.
Jaqsylyqov qyzmetten ketken soń BAQ-ta onyń ustalǵany týraly qaýeset tarap, túrli aqparat paida bolǵan. Alaida burynǵy ministr mundai málimetti birden joqqa shyǵardy. Bas prokýratýra da Jaqsylyqov ustalǵany týraly aqparatty resmi túrde rastaǵan joq.
Rýslan Jaqsylyqov týraly ne belgili?
Rýslan Jaqsylyqov 1966 jyly 4 naýryzda Almaty oblysynyń Qaskeleń qalasynda dúniege kelgen.
IIM, Qorǵanys ministrlikterinde jaýapty qyzmetter atqarǵan. Sonyń ishinde:
2021 jylǵy qyrkúiekten 2022 jyly qańtar aralyǵynda – Ishki ister ministriniń orynbasary – Qazaqstan Respýblikasy Ulttyq ulanynyń bas qolbasshysy boldy.
2022 jylǵy 19 qańtardan 2025 jyldyń 8 maýsymyna deiin Qazaqstan Respýblikasynyń Qorǵanys ministri qyzmetin atqardy.
II dárejeli "Dańq" ordenimen, shet memleketteriniń eki ordenimen jáne KSRO, TMD, Qazaqstan Respýblikasynyń 35 medalimen nagradtalǵan. Pedagogika ǵylymdarynyń kandidaty. Áskeri ataǵy - general-leitenant.
