Burynǵy Májilis depýtaty, belgili aitysker aqyn Rinat Zaiyt Qazaqstan Respýblikasy Qarýly Kúshteriniń Ulttyq áskeri-patriottyq ortalyǵynyń basshysy qyzmetine taǵaiyndaldy. Bul týraly ol Adal ADAM YouTube arnasyna bergen suhbatynda málimdedi.
Rinat Zaiyttyń aitýynsha, jańa qyzmetine 2026 jyldyń qazan aiynyń basynda kirisken. Ol Qorǵanys ministriniń shaqyrýymen áskeri-patriottyq ortalyqqa jumysqa barǵan. Burynǵy depýtat qyzmet aýystyrýyna eldiń qorǵanys salasynda bastalǵan ózgeristerdiń de áser etkenin jetkizdi.
Rinat Zaiyt suhbat barysynda jańa qyzmetiniń mindetterine toqtaldy. Onyń aitýynsha, Ulttyq áskeri-patriottyq ortalyq Qorǵanys ministrligine qarasty mekeme sanalady. Onyń quramynda áskeri ansambl men orkestr jumys isteidi. Sondai-aq ortalyq áskeri qyzmetshiler men áskerge shaqyrylýǵa deiingi jastar arasynda mádeni jáne patriottyq is-sharalar uiymdastyrýmen ainalysady.
"Qazan aiynyń basynda jańa Qorǵanys ministriniń shaqyrýymen Qorǵanys ministrligine qarasty Ulttyq áskeri-patriottyq ortalyqqa keldim. Ortalyq quramynda áskeri ansambl men orkestr bar. Sondai-aq patriottyq jáne mádeni is-sharalardy uiymdastyrady", – dedi Rinat Zaiyt.
Ol jańa qyzmetinde áskeri qyzmetshiler men jastardyń boiynda otansúigishtik qasietterdi qalyptastyrýǵa baǵyttalǵan jumystarǵa kóńil bóletinin aitty.
Burynǵy depýtattyń sózinshe, onyń sheshim qabyldaýyna Qazaqstan armiiasynda bastalǵan aýqymdy reformalar yqpal etken. Rinat Zaiyt qorǵanys salasyndaǵy ózgeristerge qatysyp, óz úlesin qosqysy keletinin jetkizdi.
"Sońǵy oqiǵalardan keiin Memleket basshysy Qasym-Jomart Toqaev qorǵanys salasynda túbegeili ózgerister júrgizýdi tapsyrdy. Bul reformalar bastalyp ta ketti. Men ózgeristerge qatysqandy unatatyn adammyn. Sondyqtan bul qyzmetke úlken qýanyshpen kelistim. Osy reformaǵa az da bolsa úles qossam degen armanmen keldim", – dedi ol.
Buǵan deiin Rinat Zaiyt Májilis depýtaty bolǵan kezeńinde de áskerdegi tártip, sarbazdardyń qaýipsizdigi jáne áskeri qyzmettiń jaýapkershiligine qatysty máselelerdi birneshe ret kótergen.
