Ekolog Oljas Dúisenovke qatysty is jańa sipat aldy. Buǵan deiin sot Dúisenov pen onyń seriktesi Ýálihan Shajirovtyń qylmystyq isin prokýratýraǵa keri qaitarǵan bolatyn, dep habarlaidy dalanews.kz.
Za nami ýje vyehali telegram arnasynyń málimetinshe, sýdia tergeý barysynda aiyptyń durys tujyrymdalmaǵanyn jáne Qylmystyq-protsestik kodeks talaptarynyń buzylǵanyn kórsetken. Sondai-aq sot aiyptalýshylardyń kásiporyndy naqty qalai "basyp alǵany" túsiniksiz ekenin atap ótti. Óitkeni is materialdaryna sáikes, jábirlenýshi investor kásiporyndaǵy 70 paiyzdyq úlesin saqtap qalǵan.
Alaida buǵan qaramastan, Oljas Dúisenov áli kúnge deiin qamaýda otyr.
Onyń advokaty Janna Ýrazbahovanyń aitýynsha, bultartpaý sharasy Qylmystyq-protsestik kodekstiń 342-babynyń talaptaryna qaishy keledi. Onyń málimetinshe, Dúisenov qamaýda 16 aidan beri otyr, onyń ishinde 12 aidan astam ýaqyt is sottyń qaraýynda bolǵan.
Al Qylmystyq-atqarý júiesi mekemesi advokattyń ótinishine bergen jaýabynda sot talqylaýy kezinde bultartpaý sharasyn tańdaý, ózgertý, uzartý nemese kúshin joiý quqyǵy sottyń quzyretine jatatynyn málimdegen.
Sondai-aq vedomstvo sotta is qaralyp jatqan kezde qamaýda ustaý merzimi alty aidan aspaýǵa tiis ekenin, al aýyr qylmystar boiynsha bul merzim sottyń sheshimimen 12 aiǵa deiin uzartylýy múmkin ekenin eske saldy.
Soǵan qaramastan, mekeme qazirgi tańda Oljas Dúisenovti bosatýǵa negiz joq dep esepteidi. Eger qorǵaýshy bul sheshimmen kelispese, ony joǵary turǵan organǵa shaǵymdana alatyny aitylǵan.
Óz kezeginde advokat Janna Ýrazbahova Facebook-tegi paraqshasynda "eger qamaýda ustaý merzimderi is júzinde saqtalmaityn bolsa, onda Konstitýtsiialyq sottyń 2026 jylǵy 10 maýsymdaǵy normativtik qaýlysy kim úshin qabyldandy?" degen saýal qoidy.
