Pavlodar oblysynyń Ekibastuz qalasynda politsiia qyzmetkerleri ustaǵan er adam bólimshede qaitys boldy, dep habarlaidy dalanews.kz.
Oblystyq politsiia departamentiniń málimetinshe, 11 tamyz kúni tártip saqshylaryna mas kúidegi er adamnyń janjal shyǵaryp, áiel adamǵa qoqan-loqy kórsetkeni týraly habarlama túsken. Oqiǵa ornyna barǵan politseiler kúdiktini ustap, politsiia bólimine jetkizgen. Keiin ol arnaiy ustaý bólmesine qamalǵan.
Arada biraz ýaqyt ótken soń er adam es-tússiz kúide tabylǵan. Oǵan meditsinalyq kómek kórsetilgenimen, ómirin saqtap qalý múmkin bolmaǵan. Politsiia oqiǵanyń mán-jaiyn anyqtaý úshin beinejazbalar tárkilengenin habarlady.
Alaida Qumash basylymy marqumnyń týystaryna silteme jasap, otbasy músheleriniń ólimniń sebepteri men ustaý barysyna qatysty birqatar suraqtary bar ekenin jazdy.
Marqumnyń ápkesiniń aitýynsha, anasy temir tordyń ar jaǵynan ulyn asylyp turǵan kúide kórgen. Týystary quqyq qorǵaý organdary bul jaǵdaidy «shorttyń baýymen jasalǵan sýitsid» retinde túsindirýge tyrysyp jatyr dep esepteidi.
Sondai-aq otbasy Rinattyń naqty qandai sebeppen ustalǵanyna, kameraǵa qamalar aldynda onyń tolyq tekserilgen-tekserilmegenine jáne politsiia qyzmetkerleri qaiǵyly jaǵdaidyń aldyn nege ala almaǵanyna qatysty jaýap kútetinin málimdegen.
Qazirgi ýaqytta oqiǵanyń barlyq mán-jaiy anyqtalyp jatyr.
