Pavlodar oblysynda qazirgi ýaqytta dáriger, muǵalim jáne tehnıkalyq sala mamandary tapshy. Halyq sany az aımaqqa Memlekettik baǵdarlama aıasynda qonys aýdarýǵa nıetti jandarǵa qoldaý da erekshe. Máselen, byltyr Túrkistan oblysynan Pavlodarǵa kóshken 90-ǵa jýyq otbasynyń músheleri jumysqa ornalastyrylyp, baspanamen qamtylǵan. Bul týraly Túrkistan oblysyna arnaıy kelgen aqparattyq-nasıhattyq top ókili Ersin Jumashev brıfıńte málimdedi, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

– Soltústikke kóshken januıadaǵy árbir adamǵa birretik 214 myń teńge qarjy beriledi. Aýyl sharýashylyǵyn damytamyn degen sharýalar úshin de jer qunarlylyǵyn atap ótkim keledi. Memleket qoryndaǵy baspanada 5 jyl kóleminde turǵan azamattarǵa úı attaryna rásimdelip beriledi. Ókinishke oraı, densaýlyǵyna baılanysty aýa raıy jaqpaı nemese otbasylyq jaǵdaılarmen týǵan jerine qaıta oralǵan azamattar bar. Bul bizdiń tarapymyzdan jaǵdaı jasalmaǵandyǵy emes, azamattardyń erikti túrde belgili sebeptermen qaıtý faktisi, – dedi Pavlodar qalasynyń jumyspen qamtý ortalyǵynyń bólim basshysy Ersin Aǵyntaıuly.

Pavlodardan Túrkistan oblysyna kelgen aqparttyq top músheleri 1 apta boıy oblys aýmaǵyndaǵy 17 qala-aýdan turǵyndarymen júzdesedi. Josparǵa saı delegasıa quramyndaǵy 40-qa jýyq maman kóshi-qon máselesi týraly tolyqqandy túsindirý jumystaryn júrgizedi.