EKSPO-2017 halyqaralyq mamandandyrylǵan kórmesi daǵdarysqa qarsy shara retinde elimizge úlken mýltiplikativtik paida ákelip jatyr. Bul týraly «Astana EKSPO-2017» UK» AQ basqarma tóraǵasy Ahmetjan Esimov aitty.
«Ákimdikten sandardy surattym, statistika organdarynan da aqparat aldyq. Mysaly, Astana boiynsha biz ekonomikanyń barlyq salasynda ekonomikalyq qyzmettiń edáýir jandanǵanyn kórip otyrmyz. Turǵyn úilerdi paidalanýǵa berý 33%-ǵa, taýar ainalymy 20%-ǵa, saýda oiyn-saýyq ortalyqtaryna kelgen adamdar 2 ese ulǵaiǵan.
Týrizm salasynda da aitarlyqtai ózgeris bar, týroperatorlarǵa júgingender sany 78%-ǵa ósken. Biz «ashyq aspan» júiesin engizdik, reister 1,3 ese artty. Helsinki, Býdapesht, Varshava siiaqty qalalarda jańa reister ashyldy. Kún saiyn Astanaǵa jeti myń adam áýe reiisimen, 16 myń adam jolaýshylar kóligimen keledi, bul óte jaqsy kórsetkish», - dedi Ahmetjan Esimov.
Onyń aitýynsha, maýsymnyń ózinde elorda biýdjetine qyzmetter salasynan túsken salyq 2,5 ese ulǵaiǵan. Astanada sondai-aq shaǵyn jáne orta biznes sýbektileri kóbeiipti.
«Biz joldyń úshten eki bóligin júrip óttik. Qazirdiń ózinde Prezidenttiń kórmeni ótkizý týraly sheshimi qanshalyqty kóregendi bolǵanyn kórip otyrmyz. Bul daǵdarysqa qarsy shara bolyp shyqty jáne elimizge úlken mýltiplikativtik paida ákelip jatyr. Kórme arqyly jetken jetistikterimizdi barlyq qazaqstandyq maqtan tutýy tiis degen oidamyn», - dep atap ótti Ahmetjan Esimov.
Onyń sózine qaraǵanda, kórme kezinde EKSPO pavilondary men nysandarynda bolǵandar sany 15 mln adamnan asty.
«Kórme taqyryby óte úlken qyzyǵýshylyq týdyrdy, kún saiyn bizde ulttyq kúnder ótip jatqanyn kórip júrsizder. 115 el men 22 halyqaralyq uiym osy saladaǵy óz tehnologiialaryn kórsetýge tyrysýda, ol kelýshilerdiń úlken qyzyǵýshylyǵyn týdyrýda, sondyqtan kórmeniń aiaqtalýyna 37 kún qalǵanda jospardaǵy kórsetkishterge jetip úlgerdik. Al halyqaralyq pavilondar men EKSPO nysandarynda bolǵandar sany 15 mln-nan asyp ketti», – dep túiindedi «Astana EKSPO-2017» UK» AQ basqarma tóraǵasy.
Derekkóz: baq.kz
