Jyl sońynda ótip jatqan aitýly shara «Jasandy intellekt jáne bilim berýdiń bolashaǵy» taqyryby aiasynda ótýde. Paneldik sessiiasynda jasandy intellekt mańaiynda spikerler men zalda jinalǵan túlekter men oqýshylar arasynda diskýssiia týyndap, ózekti taqyrypty qyzý talqylady. Sessiianyń qonaǵy, jasandy intellektti qoldaný boiynsha ekspert maman Aidyn Maýthan, tarih pániniń muǵalimi Altyngúl Kaýmenova, túlekter Beibars Jaksimanov, Abylai Sýltanbekov, 12-synyp oqýshylary Amanǵali Arýjan, Qasen Janiia jasandy intellekttiń akademiialyq adaldyqqa tigizetin áseri, paidasy men ziiany týraly pikirlerin ortaǵa saldy.
Forýmnyń arnaiy sessiialarynda túlekter óz tájiribelerine súiene otyryp Ziiatkerlik mektep oqýshylarynyń mamandyqty tańdaý, bilimdi jalǵastyrý baǵytynda týyndaityn kóptegen saýaldaryna jaýap berdi. Elimizdiń, álemniń úzdik joǵary oqý oryndarynda bilim alyp jatqan stýdenttermen qatar diplomǵa ie bolyp túrli salada qyzmet atqaryp júrgen keshegi ziiatkerler jyly tartymdy atmosferada qundy aqparattarymen bólisti.
Forým ziiatkerlerdiń túrli urpaqtary arasynda kópirdi nyǵaityp basty mindetin oryndady, bolashaqta aqparat almasý, stýdenttermen onlain-kezdesýler ótkizýge baǵyttalǵan qaýymdastyqqa jańa serpin berdi.
«Oqýyńyzdy bitirgennen keiin elge oralasyz ba?» dep zaldan qoiylǵan suraqqa:
- Men óz Otanymnyń patriotymyn. Eger meniń diplomym Qazaqstanda qundy bolmasa da, men qaityp oralyp eldi órkendetýge óz úlesimdi qosamyn. Bul NIS Alumni-diń basty qaǵidasy, - dep myzǵymastan jaýap berdi Germaniianyń Technical University-diń stýdenti Mádi Bolat.
– Forýmnan alǵan áserlerim keremet! Bul joba urpaqtar sabaqtastyǵyn nyǵaitýmen qatar, bolashaq oqýshylarymyzǵa baǵdar bola alady. Men jas býyn ókilderine keńes berip, joǵarǵy oqý ornyna tapsyrýda mindetti túrde eskeretin qajetti aqparattardy aitýǵa qashanda daiynmyn. Ziiatkerlik mektebime rizashylyǵym sheksiz. Osy qabyrǵada alǵan bilimim ýniversitetke túsýge jáne oqýǵa kóp jeńildigin berdi, – dep aǵynan jaryldy Gonkong ýniversitetiniń 4-shi kýrs stýdenti Kristina Hlopýnova.
