Aimaq pen tranzit ishinde taýarlardy tasymaldaýǵa «sheksiz» múmkindikter ashý úshin Eýraziialyq ekonomikalyq odaqtyń kólik salasyna 250 mlrd dollardan astam qarajat salý kerek. Bul týraly biznes-forýmda Eýraziialyq damý bankiniń (EADB) strategiialyq jobalar direktsiiasynyń jetekshisi Viktor Lebedev aitty.
Lebedevtiń sózine súiensek, banktiń qatysýshy memleketteri logistika ónimdiliginiń álemdik reitińinde 79-123 oryn alady. Sondyqtan EADB jaǵdaidy jaqsartýǵa múmkindik mol dep otyr. Direktsiia jetekshisi bolashaqta Ortalyq Aziianyń «alpaýyt naryqtar arasyndaǵy kópirge» ainalýy múmkin deidi. Degenmen ol úshin investitsiia salý kerek.
«2030 jylǵa qarai aimaqtaǵy taýar ainalymy 38 paiyzǵa ósedi dep otyrmyz. Bul — óte úlken kólem, oǵan kóp kúsh salý qajet. Eger tasymal sektoryndaǵy barlyq kedergini rettei alsaq, onda elder arasyndaǵy taýar ainalymyn ósirýge jáne ónimdilikti arttyrýǵa ábden bolady» deidi Viktor Lebedev.
Odan bólek, EADB strategiialyq jobalar direktsiiasynyń basshysy EAEO importtyq azyq-túlik ónimderin óz óndirisiniń analogtarymen almastyryp qana qoimai, túrli elderden 600 millionnan astam adamdy tamaqtandyra alady dep sanaidy. Ol óńirde 480 gektardan astam aýylsharýashylyq jeri bar ekenin, degenmen azyq-túlikti qaita óńdeý jáne saqtaý qýaty tapshy ekenin atap ótti.
«Azyq-túliktiń birazy basqa elderden ákelinedi. Importtyń 70 paiyzyna deiin bizdiń óńirdegi óndirispen almastyrylýy múmkin. Aimaqqa jaqyn jerde azyq-túlik jetkizetin úlken bazarlar bar: eń aldymen Qytai men Úndistan, onda shamamen 3 milliard adam turady» dep atap ótti strategiialyq jobalar direktsiiasynyń jetekshisi.
