Belgili quqyq qorǵaýshy, "NeMolchi.kz" qorynyń jetekshisi Dina Tańsári Chernogoriiada ustaldy. Qazaqstan Bas prokýratýrasy bul aqparatty rastady. Oǵan qarsy alty birdei qylmystyq is qozǵalyp, alaiaqtyq, jeke ómirge qolsuǵýshylyq jáne jalǵan aqparat taratý baptary boiynsha kúdikke ilindi.
Bul jait qoǵamda qyzý pikirtalas týdyrdy. Ásirese, áleýmettik jelide belsendilik tanytyp júrgen azamattar atalǵan oqiǵaǵa óz kózqarasyn bildire bastady. Solardyń biri – BasQaru qorynyń jetekshisi, zańger Marǵulan Ermaǵanbetuly. Ol bul istiń saiasi astary joq ekenin aityp, muny “qaiyrymdylyq atyn jamylǵan qarjylai aila” dep baǵalady, dep habarlaidy Dalanews.kz.
Tergeýge ne sebep boldy?
Tergeý derekteri boiynsha, 2023 jyldyń kókteminde Tańsári Óskemende kámeletke tolmaǵan qyzdyń óz-ózine qol jumsaǵany jóninde jalǵan aqparat taratqan. Bul jańalyq qoǵamda úlken rezonans týdyryp, qaiǵyǵa ortaqtasqan jurtshylyq onyń bastamasymen advokat jaldaýǵa dep arnaiy qarajat jinai bastaǵan. Qorytyndysynda 20 million teńgeden astam qarajat jinalǵanymen, sotta anyqtalǵandai, marqumnyń otbasy advokatty ózderi jaldap, jinalǵan qarjy múlde basqa maqsatqa jumsalǵan.
Taǵy bir iste Tańsári kámeletke tolmaǵan zorlyq qurbanyna kómek kórsetý úshin aqsha jinaǵan. Alaida tergeý bul oqiǵanyń oidan shyǵarylǵanyn, al jinalǵan qarajat onyń kúieýiniń jeke esepshotyna aýdarylǵanyn aiǵaqtaǵan.
Belsendi keiin shetelge shyqsa da, qaiyrymdylyqqa dep qarjy jinaýyn toqtatpaǵan. Qazirgi tańda jeti adam quqyq qorǵaý organdaryna aryz túsirip, ózderin aldanǵandaryn aitqan.
Sot sheshimi men ekstraditsiia máselesi
Sot Dina Tańsárini syrttai asa iri kólemde alaiaqtyq jasady dep tanyp, ony qamaýǵa alý jóninde sheshim shyǵarǵan. Alaida Qazaqstan men Chernogoriia arasynda ekstraditsiia jóninde kelisim bolmaǵandyqtan, sheteldik tarap ony qaitarýdan bas tartqan. Soǵan qaramastan, Bas prokýratýra Dinara Smaiylovany qylmystyq jaýapkershilikke tartý boiynsha jumysty jalǵastyryp jatqanyn málimdedi.
Qoǵam belsendisi ne deidi?
Osy iske qatysty zańger, qoǵam belsendisi Marǵulan Ermaǵanbetuly óz oiyn bildirdi. Ol Dina Tańsáriniń kópshiliktiń emotsiiasyna áser etý arqyly qarajat jinaǵanyn aitady.
“Qoǵamdyq qor zań júzinde tirkelip, ashyq esep júrgizýi tiis. Al bul jaǵdaida, qaiyrymdylyqtyń atyn jamylyp, emotsiialyq manipýliatsiia jasalǵan. Zorlyq-zombylyq taqyryby – adamzat tarihymen birge kele jatqan aýyr másele. Biraq ony birjaqty, ústirt qaraý – qoǵamǵa shynaiy kómektesý emes, kerisinshe senimnen aiyrylýǵa bastaityn jol”, – deidi ol.
Ermaǵanbetulynyń aitýynsha, mundai belsendiler máseleniń tereńine boilamai, tek áielderge qatysty zorlyqty kóterip, qoǵamǵa belgili bir baǵytta manipýliatsiia jasaidy.
“Eger shynymen kómekteskisi kelse, máseleniń saldarymen emes, sebebimen kúreser edi. Al zorlyqtyń túp-tamyry – rýhani daǵdarysta, quqyqtyq saýatsyzdyqta jatyr. Olar bolsa kópshiliktiń emotsiiasyn qozǵap, “donat” arqyly paida kórýge tyrysady”, – deidi ol.
Marǵulan Ermaǵanbetuly buǵan deiin Dina Tańsáriniń ózine qatysty jalǵan jazba jariialaǵanyn, ol arqyly ony aqparattyq shabýylǵa tartpaq bolǵanyn eske salady. Biraq ol zań sheńberinde jaýap berip, belsendini ashyq efirge shaqyrǵan. Alaida Tańsári bul usynysty qabyldamaǵan.
Belsendiniń efirden bas tartýyn Ermaǵanbetuly onyń quqyqtyq biliminiń taiazdyǵymen jáne qazaq tilin tolyq meńgermegenimen bailanystyrady.
“Bul jaǵdai – saiasi emes, taza qarjylai sipattaǵy másele. Sebebi qansha qarajat jinaldy, qansha jumsaldy degen suraqtarǵa naqty jaýap joq. Máselen, advokatqa 5 million qajet dese, 20 million jinaýy múmkin. Biraq onyń esebi halyqqa usynylmaidy”, – dedi qoǵam belsendisi.
