Ánshi Dımash Qudaıbergenov qatysyp jatqan qytaılyq Hýnan telearnasynyń «Singer2017» án baıqaýy úshinshi kezeńi efırde kórsetildi. Birinshi jáne ekinshi kezeńniń qorytyndysy boıynsha otandasymyz birinshi oryndy ıelense, sıngapýrlyq tanymal ánshi jarys jolynan shyǵyp qalǵan bolatyn. Joba talaptaryna sáıkes úshinshi kezeńge qytaılyq juldyz Chjan Sze jáne Chjao Leı qosyldy. Úshinshi kezeńdi Dımash úzdik úshtikpen qorytyndylady.

Jerlesimiz Queen tobynyń repertýarynan «Show most go on» ánin shyrqady. Al ekinshi kezeńde jaqsy óner kórsetken qytaılyq ánshi Tan Szın bul kezeńde bas júldeni jeńip aldy.

Aıta keterligi, Tan Szın Beıjiń Olımpıadasynyń ashylý saltanatynda án shyrqaǵan.  Al, Chjan Sze Qytaıdaǵy sýper juldyzdardyń biri sanalady. Kóptegen án baıqaýynyń jeńimpazy, sondaı - aq, osy ýaqytqa deıin 12 dana jeke án álbomy shyǵarylǵan. Ol – Qytaıdan syrt elderde jeke konsert bergen sanaýly qytaılyq ánshiniń biri. Ánshiniń Sina Weibo (Týıtterdiń balamasy) mıkroblogyna jazylýshylardyń sany 41 mıllıonan asyp ketken.

Al qytaılarǵa endi ǵana tanymal bolǵan otandasymyz Dımashtyń Sina Weibo mıkroblogyna 1 mıllıon 450 myń paıdalanýshy tirkelgen.   Eske sala ketsek, Singer 2017 baıqaýynyń irikteý kezeńi jalpy 5 bólimnen turady. Ár bólim eki kezeńge bólinip, jalpy 10 irikteý kezeńi ótkiziledi. Ár kezeńde bir qatysýshy jarys jolynan shyǵarylyp otyrady.

https://www.youtube.com/watch?v=JY-E5f8QKUo

 

Derekkózi: inform.kz