Djoshýa Bell[/caption]
2007 jyldyń qys kúnderiniń biri. Vashıngtondaǵy bir metroda er adam skrıpkamen Iogann Sebastán Bahtyń alty birdeı kúıin tabany kúrekteı qyryq bes mınýt túregep turyp oryndaıdy. Aldynda ashylyp skrıpkasynyń qaby jatady. Onyń bul turysy kóshelerde turyp, aqsha tabatyn ónerpazdan aýmaıtyn edi. Biraq, bul adam álemge áıgili, dúnıedegi eń myqty skrıpkashy Djoshýa Bell edi! Onyń oryndap turǵany eń kúrdeli kúıler, qolynadaǵy skrıpkasy úsh mıllıon bes júz myń dollar turatyn!
Ol kúı tartqan qyryq bes mınýtta shamamen eki myńdaı adam osy beketten ótken. Úsh mınýttaı ótkende, mýzykadan habary bar sıaqty kóringen bir er kisi aıaq alysyn báseńdetip, tipti birneshe sekýnd toqtap turyp tyńdaıdy da, ary qaraı asyǵys saparyna júre jóneledi. Mólshermen tórt mınýttan soń, skrıpkashy «tuńǵysh tabysyna» ıe bolady. Áıel bir dollar tastap, aıaldamastan alǵa tartady. Sosyn alty mınýt shamasynda bir jas jigit qabyrǵaǵa súıenip turyp, onyń mýzykasyn berilip tyńdaıdy. Biraq, kóp ótpeı saǵatyna qaraıdy da, asyǵys-úsigis júre jóneledi. On mınýt ótken soń, úsh-tórt jastaǵy ul bala onyń janyna toqtap, kúıin tyńdaǵysy keledi. Balanyń sheshesi ony súırelegen beti alǵa jyljıdy. Bala taǵy da toqtaı qalyp, skrıpkashyǵa qaraıdy. Sheshesi ony qolynan súırep, aıaldatpaı alyp ketedi. Bala qaıta-qaıta artyna burylyp, qaraı beredi. Munan basqa da birneshe bala ketkisi kelmeı, kóp jaltaqtaıdy. Olardyń da áke-shesheleribalalaryn súırelep, alyp ketedi.
Qyryq bes mınýtta tek alty adam ǵana toqtap turyp kúı tyńdaıdy. Jıyrma adam aqsha tastaıdy. Skrıpkashy otyz eki dollar tabady. Munan eki kún buryn ǵana osy skrıpkashy kesh ótkizgende, barlyq bıleti satylyp ketip, konsertke barýǵa jurt bılet tappaı qalǵan edi. Onyń ár jolǵy konserti ótkende bir bıleti kem degende 200 dollarǵa satylatyn. Metrodaǵy bul oqıǵa Vashıngtondaǵy bir gazet uıymdastyrǵan synaq bolatyn. Olar adamdardyń sezimin, túısigin jáne talǵamyn synap kórmekshi bolady.
Synaqtan mynadaı saýaldar týady:
1. Qarapaıym ortada, kez-kelgen ýaqytta adamdar sulýlyqty sezine ala ma?
2. Oılamaǵan jaǵdaıda talantty tanı alamyz ba? «Erdi kebenek ishinen tanıtyn» qyraǵylyǵyńyz qanshalyqty?
Eń sońynda olar mynadaı qorytyndy shyǵarǵan: dúnıedegi eń úzdik mýzykant, eń jaqsy mýzyka aspabymen, dúnıedegi eń tamasha kúıdi oryndap turǵanda, biz biraz ýaqytymyzdy qıyp, qulaq qoıa tyńdaı almasaq, onda qarbalaspen ótip bara jatqan ómir saparymyzda qansha qymbatty nárselerden bilmeı aıyrylyp qaldyq eken? Ómirde tolassyz sapar shegip, toqtaýsyz ilgerlesek te, jol jıegindegi kórkem kórinisterdi tamashalaýǵa murshamyz bolmapty. Jastyq shaqtaǵy qanshama armandarymyzdy sapar barysynda joǵaltyp aldyq deseńshi!
Daıyndaǵan Yrysbek DÁBEI
