Qazaqsan halqy Assambleiasynyń jas belsendileri biyl qurylǵanyna 30 jyl tolatyn uiymnyń osynaý mereili dataǵa aýyz toltyryp aitarlyqtai jetistiktermen jetip otyrǵanyn aitty, – dep habarlaidy Dalanews.kz.
QHA janyndaǵy Jas ǵalymdar klýbynyń teń tóraǵasy Anel Pimichevanyń aitýynsha, búgingi tańda Qazaqstan halqy Assambleiasy elimizdi meken etetin túrli etnos ókilderi birlestikteriniń basy qosylǵan orta ǵana emes, mádeniet, ǵylym, bilim men ózara yntymaqtastyqtyń ordasyna ainalyp úlgergen.
– Bizde jas ǵalymdar klýby quryldy. Bul klýb qurylǵaly beri biraz jumysty atqaryp úlgerdik. Etnomádeni birlestikterdiń jumysy, ár etnostyń mádenieti, olardyń biregeiligi, erekshelikteri týraly zertteýler júrgizdik. Bul zertteýler etnosaralyq tatýlyqty nyǵaitýymen qatar jas ǵalymdarǵa etnomádeniet, etnosaiasat baǵytynda kóptegen paidaly aqparattarǵa qol jetkizýge múmkindik berdi, – deidi ol.
Anel orys ultynyń ókili, Qostanai qalasynyń týmasy. Biraq, ol óziń "qazaqtyń orys qyzymyn" dep tanystyrady. Memlekettik tildi jetik meńgergen ol búginde qoǵamdyq jumystarmen qatar qazaq tarihyn zertteýmen ainalysady eken.
– Meniń eń basty baǵytym – qazaq tilininiń órisin keńeitýge kúsh salý. Bul baǵyt boiynsha bizde birneshe joba bar, ol media salasy, balalardy oqytý, belgili tulǵalardyń kómegimen memlekettik tildiń mártebesin arttyrý. Bizdiń klýb Qazaqstannyń kibersport federatsiiasymen birlesken jobany qolǵa aldy. Mamyr aiynda elimizde kibersporttan halyqaralyq jarys ótpekshi. Biz osy mańyzdy sharada qyzmet kórsetetin kommentatorlardy oqytyp jatyrmyz. Ondaǵy maqsat – dúniejúzine qazaq tiliniń qandai bai ekenin tanytý, – deidi Anel.
Anel elimizdegi ózge ult ókilderi arasynda memlekettik tildi úirenemin deitinder sanyn arttyrý úshin internettegi qazaqsha kontentti kóbeitý kerektigin alǵa tartyp otyr.
Aitýynsha, YouTube-te, áleýmettik jelilerde qazaqsha beinejazbalardy kóptep shyǵarý qajet. Qazirgi tańdaǵy mýltfilmder men kinolardyń qazaqsha dýbliaj jasalýy da Aneldi qýantyp otyr. Jas ǵalym endigi kezek qazir qatty damyp kele jatqan internet – strimderde deidi.
Ol aldaǵy ýaqytta qatarlastarymen birge qazaq tilindegi sapaly kontentti tikelei efirde taratyn qyzmetterdiń sanyn arttyrýǵa kóńil bólmekshi.
