Búgin Aqordada ótken jiynda Qasym-Jomart Toqaev qazaqstandyq ǵalymdarmen kezdesip, ǵylym salasyndaǵy jetistikter men ózekti máselelerge toqtaldy, dep habarlaidy Dalanews.kz.
Memleket basshysy kezdesýde qoldanbaly ǵylymdy damytý Qazaqstan úshin asa mańyzdy baǵyttardyń biri ekenin atap ótti. Onyń aitýynsha, keiingi jyldary osy saladaǵy jobalardyń sany artyp, bul oń úrdis qalyptastyrǵan.
Prezident ásirese joǵary oqý oryndarynyń tehnologiialyq damý ortalyqtaryna ainalyp kele jatqanyn alǵa tartty. Mysal retinde ol byltyr University Medical Center quramyndaǵy Júrek ortalyǵy dárigerleriniń ALEM (Astana Life Ex-situ Machine) atty innovatsiialyq qurylǵy oilap tapqanyn tilge tiek etti.
“Bul qurylǵy donorlyq aǵzalardyń ómirsheńdigin 24 saǵattan astam ýaqyt saqtaýǵa múmkindik beredi. Mundai biregei jańalyqtar otandyq ǵylymnyń áleýeti joǵary ekenin kórsetedi», – dedi Qasym-Jomart Toqaev.
Sonymen qatar prezident ǵylym salasynda sheshimin tappaǵan máseleler de bar ekenin jasyrmady. Ol buǵan deiin ál-Farabi atyndaǵy Qazaq ulttyq ýniversiteti ǵalymdarymen kezdesý barysynda osy máselelerdi kótergenin eske saldy.
"Ǵylymdy qarjylandyrý júiesin retke keltirip, qatań baqylaýǵa alý qajet. Negizgi maqsat – qarjyny igerý emes, qoǵamǵa naqty paida ákeletin jobalardy júzege asyrý", – dep túiindedi memleket basshysy.
