Dástúrli ánshi Erkin Shúkiman Fly Arystan áýe kompaniiasynyń dombyra alyp júrýge qatysty talaptaryn synǵa aldy. Onyń aitýynsha, kompaniia ulttyq aspapty bortqa kirgizýge ruqsat bergenimen, jolaýshylar úshin qosymsha qolaisyzdyqtar saqtalyp otyr, dep habarlaidy dalanews.kz.
Óner iesi áleýmettik jelidegi jazbasynda jýyrda ushaqpen saparlaý kezinde jańa talaptarǵa tap bolǵanyn aitty.
«Ushaqta dombyrany alyp júrýge ruqsat berdi dep edi. Sóitsek, Fly Arystan kompaniiasyna qosymsha bes myń teńge tóleýiń kerek eken. Bes myńdy qoishy... Endi bir adamnyń eki qol júgin alyp ótýine tyiym salyp tastapty. Qolyńda dombyrań, shaǵyn koferde sahnalyq kiimiń bolady. Ekeýiniń bireýin bagajǵa tapsyrasyń», – dep jazdy ol.
Ánshiniń sózinshe, mundai talaptar ásirese gastroldik saparmen jii júretin óner adamdaryna qiyndyq týǵyzady. Onyń pikirinshe, dombyrany bortqa alyp kirýge ruqsat berý máselesi tolyq sheshilmegen.
«Bulardyń dombyraǵa ruqsat bergenimen, báribir qorlaýy qosa júrgenin búgin bilip qairan qalyp otyrmyn», – dedi Erkin Shúkiman.
Óner iesi sondai-aq Fly Arystan men Air Astana áýe kompaniialaryndaǵy talaptardyń aiyrmashylyǵyna nazar aýdardy.
Onyń aitýynsha, Air Astana reisterinde jolaýshylar dombyra men qol júgin esh kedergisiz alyp óte alady. Osyǵan bailanysty ánshi Fly Arystan-nyń ulttyq aspapqa qatysty ustanymyna túsinbei otyrǵanyn jetkizdi.
«Fly Arystan Air Astana-nyń ishinen qurylǵan kompaniia eken. Air Astana ushaqtaryna dombyrańyzdy da, qol júgińizdi de kedergisiz alyp ótýge bolady da, Fly Arystan nege dombyraǵa dońaibat kórsetip keledi?» – dep jazdy ol.
Aita keteiik, sońǵy jyldary qoǵamda dombyrany ushaq bortyna alyp ótý máselesi birneshe ret kóterilip, ulttyq aspapqa erekshe jaǵdai jasaý týraly talaptar aitylǵan bolatyn.
