Kesheli beri ulttyq valiýtadan bereke ketip, qatty qunsyzdanýda. Osyǵan bailanysty QR Ulttyq Bank búgin valiýta naryǵyna qatysty tolyqqandy aqparat usyndy, dep habarlaidy Dalanews.kz.
Aita ketsek, 7 sáýirde dollar baǵamy birjada sharyqtap qoia berdi, birden ústine 12,8 teńge ústemelegen 1 AQSh dollary 518,31 teńge boldy.
"Jahandyq naryqtardaǵy qubylmalylyqtyń artýy men negizgi eksport taýarlary baǵasynyń teris dinamika berýinen 7 sáýir kúni KASE saýdasynda teńgeniń birjadaǵy baǵamy 1 AQSh dollaryna 519,12 teńgeni qurap, aldyńǵy saýda kúninen beri 2,7%-ǵa álsiredi (bir apta ishindegi álsireý kórsetkishi – 2,9%). Ulttyq valiýtaǵa syrtqy faktorlar, sonyń ishinde álem boiynsha táýekel-sentimenttiń nasharlaýyna bailanysty beirezidentterdiń shetel valiýtasyna degen suranysy artqany yqpal etip otyr", - deidi Ulttyq Bank.
Ortalyq banktiń málimetinshe, suranystyń ósýi saýda kóleminiń ulǵaiýyna da áser etti: 7 sáýirdiń qorytyndysy boiynsha KASE-degi operatsiialar kólemi 456,4 mln AQSh dollaryna jetti. Bul – jyl basynan bergi bir kúndegi ortasha kólemnen shamamen eki ese artyq.
"Ulttyq Bank biýdjet transfertteri men affinajdalǵan altyndy satyp alýǵa bailanysty aqsha-kredit saiasatynyń beitaraptyǵyn saqtaý maqsatynda shetel valiýtasyn satý operatsiialary arqyly Ulttyq valiýtaǵa qoldaý kórsetýdi jalǵastyrýda. Bul operatsiialar buǵan deiin jariialanǵan kólemde júzege asyrylyp jatyr", - deidi qarjylyq organ baspasóz qyzmeti.
Sondai-aq Ulttyq Bank AQSh Prezidenti Ákimshiliginiń birqatar saiasi sheshimine bailanysty jahandyq qarjy naryqtarynda qubylmalylyq kúsheigeni baiqalatynyn, saýda shielenisi men protektsionistik ritorika kúsheie berse, jahandyq retsessiia bastalýy múmkin degen naryq qatysýshylarynyń alańdaýshylyǵy da arta túsetinin eskertedi.
"Naryqtar táýekel etýge degen qulshynysty kúrt seiiltip, táýekeldi aktivterdi qunsyzdandyrý arqyly osy jaǵdaiǵa reaktsiia bildirip jatyr. AQSh-taǵy negizgi qor indeksteriniń dinamikasy qazir teris aimaqta tur. Sonymen qatar, munai baǵasy da aitarlyqtai arzandady", delingen resmi habarlamada.
"Qara altynnyń" baǵasy 2025 jylǵy 7 sáýirdegi jaǵdai boiynsha bir apta ishinde (31 naýryz ben 7 sáýir aralyǵynda) 14,1%-ǵa tómendep, barreline $65-ten tómen tústi. Bul – keiingi tórt jyldaǵy eń tómengi kórsetkish. Munai óndirisine qoiylǵan shekteýlerdi tez arada alyp tastaýǵa qatysty OPEK+ uiymynyń buǵan deiin qabyldaǵan sheshimi jáne Aziia elderine barlyq munai markasynyń bir barrelin $2,3-ke tómendetetini týraly Saýd Arabiiasynyń málimdemesi munai baǵasyna qosymsha qysym túsirdi. Osylaisha, baǵa 2022 jylǵy qazannan beri aitarlyqtai tómendedi.
"Munai baǵasynyń quldyraýy men álemdegi belgisizdiktiń kúsheiýine bailanysty damýshy naryqtar (EM) men shikizatqa negizdelgen ekonomikalardyń valiýtasy álsirep jatyr. Osylaisha, EM elderiniń valiýta indeksi bir apta ishinde 1,8%-ǵa álsiredi (2025 jylǵy 31 naýryz ben 7 sáýir aralyǵynda). Ońtústik Afrika randy 7,3%-ǵa, Resei rýbli 3,8%-ǵa, Braziliia realy 3,5%-ǵa, Indoneziia rýpiiasy 1,5%-ǵa, al Meksika pesosy 1,1%-ǵa arzandady", - deidi Ulttyq Bank.
Ulttyq Bank valiýta naryǵyndaǵy jaǵdaidy baqylaýda ustap otyr, sondai-aq, qajet bolǵan jaǵdaida, aiyrbas baǵamyn turaqsyzdandyratyn shamadan tys qubylmalylyqqa jol bermeý úshin qajet sharalardy qabyldaýǵa daiyn.
Buǵan deiin saitymyzda "Teńge qunsyzdanyp jatyr". Sarapshylar AQSh dollaryna qatysty óz boljamdarymen bólisti" degen material jariialanǵan bolatyn. Sondai-aq "Qazaqstandy jazalap jatyr". Sarapshy aldaǵy kúnderi 1 AQSh dollary 530 teńge bolýy múmkin ekenin aitty" degen maqalany da oqi otyryńyzdar.
