Dini aǵymdar saiasatqa ashyq aralasa bastady
Ol kisi mynadai paiymǵa keledi:
1. Dini aǵymdar, ábden kúsh alǵany sonsha, ashyqtan-ashyq saiasatqa aralasa bastady. Biliktegi aýyspaly kezeńdi paidalanyp qalǵysy keletin syńaily. Tipti aldaǵy parlamenttik sailaý aldynda saiasi partiia ashyp alsa da tań qalmaimyn. Oǵan olardyń kúsh-qairaty da, qarajaty da jetedi. Onyń arty nege alyp kelerin mensiz de boljap otyrǵan bolarsyzdar.
2. Dini uiymdar ártis pen sportshylardy jaiǵap bolyp, huqyq qorǵaý organdaryna yqpal etýge kóshti. Bilikti qorǵap qalatyn da, tóńkerip aýdara salatyn da birden-bir kúsh - armiia men politsiia ekenin olar da jaqsy túsinedi. Bizden aqymaq emes.
3. Biliktiń din adamdaryn ákelip kúshtik qurylymdarǵa ýaǵyz oqýǵa ruqsat berýi bul organdarda eldegi qalyptasqan ahýalǵa riza emes toptardyń kóbeiip kele jatqanyn kórsetse kerek. Demek politsiia men armiiada bojyraý bar.
4. Tazabektiń bul sózderi - politsiia men armiiany halyqqa qarsy aidap salý. Ashyq konfrontatsiiaǵa shaqyrý. Narazylardy basyp-janyshtaýǵa úgitteý. Bul jerde de olardyń óz oilaǵany bar. Halyq pen politsiia arasynda qaqtyǵys bola qalǵan jaǵdaida, kim jeńiske jetse de, dini aǵymdardyń upaiy túgel. Bilik narazylardy kúshtep bassa, eń aldymen sol biliktiń óziniń abyroiy qulaidy. Halyq narazylyǵy odan beter arta túsedi. Bul aksioma. Al egerde ereýilge shyqqandar jeńgen bolsa, onda dini aǵymdar úshin bilikke tikelei jol ashylady.
5. Din ýaǵyzshylary ázirge biliktiń sózin sóilep, solardyń soiylyn soqqan bolyp júr. Onyń da óz esebi men logikasy bar. Kimde kúsh bolsa, soǵan jaqtasý kerek. Sonyń shashbaýyn kótergen jón. Seniki durys, sen danyshpansyń dep kópshik tastap qoiyp otyrý kerek.
Tipti zańsyz áreketterin de qolpashtap qoiǵan artyq bolmaidy. Sóitip bilikti ábden azǵyryp, óz halqyna qarsy aidap salýǵa bolady. Ekinshi jaǵynan jábirlengenderdi baýyrǵa basyp, basynan sipap óz qatarlaryn kóbeitýge de múmkindik týady. Al erteń bilik álsirep jatsa, al halyq narazylyǵy ósken bolsa, kór de tur, sol dini aǵymdar aldymen qol bastap shyǵady. Osyny bilik nege túsinbeitinine tańym bar.
