Jýrnalist Dias Nuraqyn Almaty oblysy Saty aýylynda bir jigit ziratty talqandap tastaǵanyn aityp, áleýmettik jelide video jariialady, – dep habarlaidy Dalanews.kz.
Kadrlarda ár jerde shashylǵan zirat tastary kórinedi.
"Kólsaidyń túbindegi Saty aýylyn soqyr senim kezip júr. Osy aýyldyń bir jigiti "dinimizge qaishy" degen jeleýmen ziratty talqandap tastapty. Ólgen adamdardyń qulyptastaryn qiratyp, jan-jaqqa laqtyryp ketken", - dep jazdy ol.
Dias Nuraqynnyń sózinshe, jaqyndarynyń qabiri qorlanǵanyn kórgen aiadai ǵana aýyl turǵyndary ashýly.
"Osyndai ásiredinshilerdiń kesirinen el arasyna iritki túsedi. Bir esersoq bútin bir aýyldyń berekesin qashyrady. Bir qumalaq bir qaryn maidi shiritedi. Munyń bári - tiktok imamdardyń, ýaǵyzshyl ustazdardyń kesiri. Bir ǵana kitap oqyp alǵan, kókiregi soqyr adamdar solarǵa senip, asyl dinimizdi lastap bitti", - dep jazdy jýrnalist.
Al Májilis depýtaty, zańger Abzal Quspan bul jaǵdaida zańǵa sáikes jaýapqa tartýǵa bolatynyn málimdedi.
"Qylmystyq kodekstiń 314-babymen qýdalanatyn áreket, jergilikti organǵa júginý kerek", - dedi ol.
Jeli qoldanýshylary arasynda da bul kórinis qyzý talqyǵa túsip jatyr.
"Jaýapqa tartpai, olar kóbeie beredi", "Dini teris aǵymdaǵylardyń istegeni emes pe?", "Masqara, zańmen sottaý kerek", "Sumdyq áreket, aýylda jiyn ótkizip, halyqtyń aldyna shyǵarý kerek mundai soraqy áreketke barǵandardy. Talqyǵa salý kerek. Zań aldynda jaýap bersin", "Ulttyq qundylyqtarymyzdy qorǵap qalý úshin din týraly myqty zań kerek", - dedi jelidegiler.
