جۋرناليست دياس نۇراقىن الماتى وبلىسى ساتى اۋىلىندا ءبىر جىگىت زيراتتى تالقانداپ تاستاعانىن ايتىپ، الەۋمەتتىك جەلىدە ۆيدەو جاريالادى، – دەپ حابارلايدى Dalanews.kz.
كادرلاردا ءار جەردە شاشىلعان زيرات تاستارى كورىنەدى.
"كولسايدىڭ تۇبىندەگى ساتى اۋىلىن سوقىر سەنىم كەزىپ ءجۇر. وسى اۋىلدىڭ ءبىر جىگىتى "دىنىمىزگە قايشى" دەگەن جەلەۋمەن زيراتتى تالقانداپ تاستاپتى. ولگەن ادامداردىڭ قۇلىپتاستارىن قيراتىپ، جان-جاققا لاقتىرىپ كەتكەن"، - دەپ جازدى ول.
دياس نۇراقىننىڭ سوزىنشە، جاقىندارىنىڭ ءقابىرى قورلانعانىن كورگەن اياداي عانا اۋىل تۇرعىندارى اشۋلى.
"وسىنداي اسىرەدىنشىلەردىڭ كەسىرىنەن ەل اراسىنا ىرىتكى تۇسەدى. ءبىر ەسەرسوق ءبۇتىن ءبىر اۋىلدىڭ بەرەكەسىن قاشىرادى. ءبىر قۇمالاق ءبىر قارىن ءمايدى شىرىتەدى. مۇنىڭ ءبارى - تيكتوك يمامداردىڭ، ۋاعىزشىل ۇستازداردىڭ كەسىرى. ءبىر عانا كىتاپ وقىپ العان، كوكىرەگى سوقىر ادامدار سولارعا سەنىپ، اسىل ءدىنىمىزدى لاستاپ ءبىتتى"، - دەپ جازدى جۋرناليست.
ال ءماجىلىس دەپۋتاتى، زاڭگەر ابزال قۇسپان بۇل جاعدايدا زاڭعا سايكەس جاۋاپقا تارتۋعا بولاتىنىن مالىمدەدى.
"قىلمىستىق كودەكستىڭ 314-بابىمەن قۋدالاناتىن ارەكەت، جەرگىلىكتى ورگانعا جۇگىنۋ كەرەك"، - دەدى ول.
جەلى قولدانۋشىلارى اراسىندا دا بۇل كورىنىس قىزۋ تالقىعا ءتۇسىپ جاتىر.
"جاۋاپقا تارتپاي، ولار كوبەيە بەرەدى"، "ءدىني تەرىس اعىمداعىلاردىڭ ىستەگەنى ەمەس پە؟"، "ماسقارا، زاڭمەن سوتتاۋ كەرەك"، "سۇمدىق ارەكەت، اۋىلدا جيىن وتكىزىپ، حالىقتىڭ الدىنا شىعارۋ كەرەك مۇنداي سوراقى ارەكەتكە بارعانداردى. تالقىعا سالۋ كەرەك. زاڭ الدىندا جاۋاپ بەرسىن"، "ۇلتتىق قۇندىلىقتارىمىزدى قورعاپ قالۋ ءۇشىن ءدىن تۋرالى مىقتى زاڭ كەرەك"، - دەدى جەلىدەگىلەر.
