Qairat Qudaibergen Qańtar oqiǵasyna bailanysty suraqtarǵa detektor arqyly jaýap berýdi surap, sotqa taǵy da ashyq túrde ótinish bildirdi, dep habarlaidy Dalanews.kz.
Almaty qalasy máslihatynyń burynǵy depýtaty ári kásipeker Qairat Qudaibergenniń Facebook paraqshasynda Qańtar oqiǵasyna bailanysty apelliatsiialyq shaǵymy paida boldy. Munda ol sot úkimi shyndyqtyń aq-qarasyn anyqtaý úshin poligraf qoldanýdan bas tartqanyn málimdeidi.
"Óitkeni olardyń jasyratyny bar. Al mende joq. Men tek shyndyqqa qol jetkizgim keledi. Búginde Prezident Toqaevty qaskóilikpen aldap, jalǵan aqparat berip, óziniń qorqaqtyǵyn jasyrý úshin ony birneshe ret jańylystyrýda", - deidi ol.
Osy tusta ol jasamaǵan qylmysy úshin 10 jyl túrmede otyrýǵa daiyn ekenin de jetkizdi.
"Eń bastysy – namysymdy satpadym jáne eshkimge jala jappadym. Qorqynyshqa da boi aldyrmadym ári jalǵan kýálik bermedim. Sol sebepti eńsemdi túsirmei, kez kelgen adamnyń kózine tike qarai alamyn", - deidi Qudaibergen.
Sonymen qatar ol eshqashan eline, ásirese, halqyna qarsy shyqpaitynyn, týǵan eli men onyń táýelsizdigi úshin janyn berýge daiyn ekenin basa aityp, Qantar kezinde muny sózben emes, ispen dáleldegenin atap ótti.
"Halqyma árqashan qiyn-qystaý kezde kómek qolyn sozdym. Sý tasqyny, órt, jer silkinisi nemese pandemiia syndy apat bolǵan jerlerde árdaiym tóbe kórsettim. Qajet jerden tabyldym" - deidi, kásipker.
Eske sala keteiik, Qairat Qudaibergen 2022 jyldyń sáýirinde ustalǵan edi. Tergeý jeltoqsan aiynyń sońynda aiaqtalyp, sot 2023 jyldyń qyrkúieginde bastaldy. Protsess jabyq formatta ótti. Qairat Qudaibergenge Almatyda jappai tártipsizdik uiymdastyrdy degen aiyp taǵylǵan bolatyn. Prokýrorlardyń aitýynsha, Qudaibergen A.Jumageldievpen ("Dikii Arman") birge "Qazaqstan" qonaq úiinde adamdar jinaýdy uiymdastyryp, Armannyń ainalasyna birigýge, ony qoldaýǵa jáne bilikke biryńǵai talaptar usynýǵa shaqyrǵan. Sondai-aq adamdardy 10 "uiashyqtar" boiynsha bólip jáne olardyń toptarynyń erekshelikteriniń belgisi retinde qoldaryna aq tańǵyshtardy tańýǵa nusqaý bergeni anyqtalǵan.
