قايرات قۇدايبەرگەن قاڭتار وقيعاسىنا بايلانىستى سۇراقتارعا دەتەكتور ارقىلى جاۋاپ بەرۋدى سۇراپ، سوتقا تاعى دا اشىق تۇردە ءوتىنىش ءبىلدىردى، دەپ حابارلايدى Dalanews.kz.
الماتى قالاسى ءماسليحاتىنىڭ بۇرىنعى دەپۋتاتى ءارى كاسىپەكەر قايرات قۇدايبەرگەننىڭ Facebook پاراقشاسىندا قاڭتار وقيعاسىنا بايلانىستى اپەللياسيالىق شاعىمى پايدا بولدى. مۇندا ول سوت ۇكىمى شىندىقتىڭ اق-قاراسىن انىقتاۋ ءۇشىن پوليگراف قولدانۋدان باس تارتقانىن مالىمدەيدى.
"ويتكەنى ولاردىڭ جاسىراتىنى بار. ال مەندە جوق. مەن تەك شىندىققا قول جەتكىزگىم كەلەدى. بۇگىندە پرەزيدەنت توقايەۆتى قاسكويلىكپەن الداپ، جالعان اقپارات بەرىپ، ءوزىنىڭ قورقاقتىعىن جاسىرۋ ءۇشىن ونى بىرنەشە رەت جاڭىلىستىرۋدا"، - دەيدى ول.
وسى تۇستا ول جاساماعان قىلمىسى ءۇشىن 10 جىل تۇرمەدە وتىرۋعا دايىن ەكەنىن دە جەتكىزدى.
"ەڭ باستىسى – نامىسىمدى ساتپادىم جانە ەشكىمگە جالا جاپپادىم. قورقىنىشقا دا بوي الدىرمادىم ءارى جالعان كۋالىك بەرمەدىم. سول سەبەپتى ەڭسەمدى تۇسىرمەي، كەز كەلگەن ادامنىڭ كوزىنە تىكە قاراي الامىن"، - دەيدى قۇدايبەرگەن.
سونىمەن قاتار ول ەشقاشان ەلىنە، اسىرەسە، حالقىنا قارسى شىقپايتىنىن، تۋعان ەلى مەن ونىڭ تاۋەلسىزدىگى ءۇشىن جانىن بەرۋگە دايىن ەكەنىن باسا ايتىپ، قانتار كەزىندە مۇنى سوزبەن ەمەس، ىسپەن دالەلدەگەنىن اتاپ ءوتتى.
"حالقىما ءارقاشان قيىن-قىستاۋ كەزدە كومەك قولىن سوزدىم. سۋ تاسقىنى، ءورت، جەر سىلكىنىسى نەمەسە پاندەميا سىندى اپات بولعان جەرلەردە ءاردايىم توبە كورسەتتىم. قاجەت جەردەن تابىلدىم" - دەيدى، كاسىپكەر.
ەسكە سالا كەتەيىك، قايرات قۇدايبەرگەن 2022 جىلدىڭ ساۋىرىندە ۇستالعان ەدى. تەرگەۋ جەلتوقسان ايىنىڭ سوڭىندا اياقتالىپ، سوت 2023 جىلدىڭ قىركۇيەگىندە باستالدى. پروسەسس جابىق فورماتتا ءوتتى. قايرات قۇدايبەرگەنگە الماتىدا جاپپاي تارتىپسىزدىك ۇيىمداستىردى دەگەن ايىپ تاعىلعان بولاتىن. پروكۋرورلاردىڭ ايتۋىنشا، قۇدايبەرگەن ا.جۇماگەلدييەۆپەن ("ديكيي ارمان") بىرگە "قازاقستان" قوناق ۇيىندە ادامدار جيناۋدى ۇيىمداستىرىپ، ارماننىڭ اينالاسىنا بىرىگۋگە، ونى قولداۋعا جانە بيلىككە ءبىرىڭعاي تالاپتار ۇسىنۋعا شاقىرعان. سونداي-اق ادامداردى 10 "ۇياشىقتار" بويىنشا ءبولىپ جانە ولاردىڭ توپتارىنىڭ ەرەكشەلىكتەرىنىڭ بەلگىسى رەتىندە قولدارىنا اق تاڭعىشتاردى تاڭۋعا نۇسقاۋ بەرگەنى انىقتالعان.
