Qazaqstannyń Desanttyq-shabýyldaý áskerleri quramynda ushqyshsyz aviatsiialyq júielerdi damytý baǵytynda júieli jumys júrgizilip jatyr, dep habarlaidy Dalanews.kz.
Qazirgi tańda drondardy jinaqtaý, baptaý, synaqtan ótkizý jáne áskeri bólimderge tapsyrýdyń tolyq óndiristik tsikli jolǵa qoiylǵan.
Ushqyshsyz aviatsiialyq júieler bólimsheleri Desanttyq-shabýyldaý áskerleri quramynda eki jyl buryn qurylǵan. Osy ýaqyt aralyǵynda áskeri qyzmetshiler drondardy tájiribede qoldanýmen qatar, olardy óz kúshimen jinaqtaý jáne jóndeý isin de meńgerdi. Bul áskerdiń ishki qajettilikteriniń edáýir bóligin derbes qamtamasyz etýge múmkindik berip otyr.
Drondardy jasaý, jinaý jáne jóndeý sheberhanasy 2025 jyldyń jeltoqsan aiynda iske qosyldy. Munda arnaiy daiyndyqtan ótken kelisimshart negizindegi áskeri qyzmetshiler eńbek etedi. Jýyrda atalǵan sheberhanada júzinshi ushqyshsyz ushý apparaty qurastyryldy.
Jinalǵan barlyq drondar mindetti túrde baqylaý synaqtarynan ótkizilip, sodan keiin ǵana áskeri bólimderge beriledi. Mamandardyń aitýynsha, bul baǵytty damytý qazirgi zamanǵy soǵys qimyldarynyń talaptarymen tikelei bailanysty. Qazirgi qarýly qaqtyǵystardy taldaý ushqyshsyz apparattardyń barlaý júrgizý, atysty túzetý jáne bólimshelerdi basqarýdaǵy mańyzy artqanyn kórsetip otyr.
Biyl Desanttyq-shabýyldaý áskerleriniń oqý ortalyǵy bazasynda ushqyshsyz ushý apparattarynyń operatorlaryn daiarlaý bastalady. Oqytýdy arnaiy kýrstardan ótken, túrli úlgidegi drondarmen jumys tájiribesi bar nusqaýshylar júrgizedi.
Ushqyshsyz aviatsiialyq júieler bólimsheleri «Desant-2025» oqý-jattyǵýlary barysynda alǵashqy jaýyngerlik synaqtan ótti. Olar áýe barlaýyn júrgizip, aviatsiia men artilleriianyń atysyn túzetýge, soqqy berý operatsiialaryna jáne bólimshelerdi naqty ýaqyt rejiminde basqarýǵa qatysty.
Qazirgi ýaqytta Desanttyq-shabýyldaý áskerleriniń qarý-jaraǵynda otandyq jáne sheteldik óndiristegi taktikalyq ushqyshsyz aviatsiialyq júieler bar. Bul baǵyttaǵy damytý, jańǵyrtý jáne jetildirý jumystary aldaǵy ýaqytta da josparly túrde jalǵasyn tabady.
