قازاقستاننىڭ دەسانتتىق-شابۋىلداۋ اسكەرلەرى قۇرامىندا ۇشقىشسىز اۆياسيالىق جۇيەلەردى دامىتۋ باعىتىندا جۇيەلى جۇمىس جۇرگىزىلىپ جاتىر، دەپ حابارلايدى Dalanews.kz.
قازىرگى تاڭدا درونداردى جيناقتاۋ، باپتاۋ، سىناقتان وتكىزۋ جانە اسكەري بولىمدەرگە تاپسىرۋدىڭ تولىق وندىرىستىك سيكلى جولعا قويىلعان.
ۇشقىشسىز اۆياسيالىق جۇيەلەر بولىمشەلەرى دەسانتتىق-شابۋىلداۋ اسكەرلەرى قۇرامىندا ەكى جىل بۇرىن قۇرىلعان. وسى ۋاقىت ارالىعىندا اسكەري قىزمەتشىلەر درونداردى تاجىريبەدە قولدانۋمەن قاتار، ولاردى ءوز كۇشىمەن جيناقتاۋ جانە جوندەۋ ءىسىن دە مەڭگەردى. بۇل اسكەردىڭ ىشكى قاجەتتىلىكتەرىنىڭ ەداۋىر بولىگىن دەربەس قامتاماسىز ەتۋگە مۇمكىندىك بەرىپ وتىر.
درونداردى جاساۋ، جيناۋ جانە جوندەۋ شەبەرحاناسى 2025 جىلدىڭ جەلتوقسان ايىندا ىسكە قوسىلدى. مۇندا ارنايى دايىندىقتان وتكەن كەلىسىمشارت نەگىزىندەگى اسكەري قىزمەتشىلەر ەڭبەك ەتەدى. جۋىردا اتالعان شەبەرحانادا ءجۇزىنشى ۇشقىشسىز ۇشۋ اپپاراتى قۇراستىرىلدى.
جينالعان بارلىق دروندار مىندەتتى تۇردە باقىلاۋ سىناقتارىنان وتكىزىلىپ، سودان كەيىن عانا اسكەري بولىمدەرگە بەرىلەدى. مامانداردىڭ ايتۋىنشا، بۇل باعىتتى دامىتۋ قازىرگى زامانعى سوعىس قيمىلدارىنىڭ تالاپتارىمەن تىكەلەي بايلانىستى. قازىرگى قارۋلى قاقتىعىستاردى تالداۋ ۇشقىشسىز اپپاراتتاردىڭ بارلاۋ جۇرگىزۋ، اتىستى تۇزەتۋ جانە بولىمشەلەردى باسقارۋداعى ماڭىزى ارتقانىن كورسەتىپ وتىر.
بيىل دەسانتتىق-شابۋىلداۋ اسكەرلەرىنىڭ وقۋ ورتالىعى بازاسىندا ۇشقىشسىز ۇشۋ اپپاراتتارىنىڭ وپەراتورلارىن دايارلاۋ باستالادى. وقىتۋدى ارنايى كۋرستاردان وتكەن، ءتۇرلى ۇلگىدەگى دروندارمەن جۇمىس تاجىريبەسى بار نۇسقاۋشىلار جۇرگىزەدى.
ۇشقىشسىز اۆياسيالىق جۇيەلەر بولىمشەلەرى «دەسانت-2025» وقۋ-جاتتىعۋلارى بارىسىندا العاشقى جاۋىنگەرلىك سىناقتان ءوتتى. ولار اۋە بارلاۋىن جۇرگىزىپ، اۆياسيا مەن ارتيللەريانىڭ اتىسىن تۇزەتۋگە، سوققى بەرۋ وپەراسيالارىنا جانە بولىمشەلەردى ناقتى ۋاقىت رەجيمىندە باسقارۋعا قاتىستى.
قازىرگى ۋاقىتتا دەسانتتىق-شابۋىلداۋ اسكەرلەرىنىڭ قارۋ-جاراعىندا وتاندىق جانە شەتەلدىك وندىرىستەگى تاكتيكالىق ۇشقىشسىز اۆياسيالىق جۇيەلەر بار. بۇل باعىتتاعى دامىتۋ، جاڭعىرتۋ جانە جەتىلدىرۋ جۇمىستارى الداعى ۋاقىتتا دا جوسپارلى تۇردە جالعاسىن تابادى.
