Parlament depýtattary kelisim qujatyn 6 maýsymda áleýmettik saiasat jónindegi komitet jinalysynda talqylady. Densaýlyq saqtaý ministriniń orynbasary Núriila Sherievanyń málimdeýinshe, vaktsinany 2024 jylǵa satyp alý kózdelgen. Qazir Qyrǵyzstanda vaktsinanyń 2,5 mln dozasy bar, solardyń 1,5 mln danasynyń jaramdylyq merzimi biyl shilde aiynda bitedi.
Alaida depýtattar kelisimge qarsy shyqty. Aibek Matkerimov vaktsina satyp alǵany úshin densaýlyq saqtaý ministri Alymqadyr Beishenáliev tergeý izoliatorynda otyrǵanyn eske saldy.
– Osynsha vaktsinanyń merzimi ótip jatqanda, nesiege vaktsina satyp alýdyń ne qajeti bar? Nesieni paiyzymen qaitarý kerek bolady. Sizder qolyńyzdaǵyny paidalanyp úlgere almai jatsyzdar, – dedi depýtat Jyldyz Sadyrbaeva.
Parlament depýtattary nesie kelisimin qaraýdy kelisi jinalysqa qaldyrdy.
2 maýsymda densaýlyq saqtaý ministri Alymqadyr Beishenáliev para aldy degen kúdikpen ustalǵany málim boldy.
Quzyrly organ málimetinshe, elde vaktsina bar bola tura, ministr 1,5 mlrd somdy vaktsina satyp alýǵa aýdarýǵa tapsyrma bergen, biraq qarajat ofshordaǵy aimaqqa túsken. Bas prokýratýra ministrdiń ústinen barlyǵy jeti qylmystyq is qozǵalǵanyn málimdedi.
