Májilistiń jalpy otyrysynda depýtat premer-ministrdiń orynbasary Tamara Dúisenovaǵa suraq qoiyp, memlekettik jobalardyń igiligin halyq kóre almai otyrǵanyn jetkizdi.
Tamara Qasymqyzy, baiandamańyzda barlyq josparlanǵan jumystar Úkimettiń baqylaýynda ekenine sendirgim keledi dedińiz. Meniń de sengim keledi. Biraq sene almaimyn. Óitkeni siz sózińizde depýtattardyń usynysy eskerildi dedińiz. Meniń sózimdi qaperine alyp jatqan ministrlik ókilin áli kúnge deiin kórmedim, - dedi Rinat Zaiytov.
Sonymen qatar, ol sózine naqty dálel keltirýge tyrysty.
«Áneýgúni eń bolmasa MÁMS-ti toqtata turaiyq dedim. Ony eshkim eskermedi. Bir apta buryn taǵy da Aqtoǵai eldi mekeninde aýrýhanaǵa jete almai, 1994 jylǵy jigit qaitys boldy. Sodan keiin siz baǵa 15 paiyzdan aspaidy dedińiz. Buǵan da sený qiyn. Eldi mekenderdi 2027 jylǵa deiin gazben qamtamasyz etemiz deisiz. Men buǵan múlde senbeimin.
Mysaly, Almaty oblysynyń Balqash aýdany Baqanas eldi mekeninde osydan 3 jyl buryn qubyryn, bárin tartyp qoiǵan. Qubyrlar shiri bastady, gaz áli joq.
2 jylda júzdegen aýyldy sýmen qamtamasyz etemiz dedińizder. Bularyńyz da ótirik. Óitkeni Aiagóz aýdanyndaǵy qarapaiym 3 aýyldy sýmen qamtamasyz ete almai otyrǵandaryńyzǵa 10 jyldan asyp ketti. «Jaily mektep» jobasy boiynsha 369 mektep salam degenderińizge múlde senbeimin. Aiyp etpeńizder, Astana-Almaty tasjoly kelesi jyly bitedi deisizder. Qalbataý-Maiqapshaǵai jolynyń bitpei jatqanyna qansha jyl bolǵanyn biletin shyǵarsyzdar...
Osyǵan bailanysty suraq qoiǵym keledi. Qurmetti Tamara Qasymqyzy, josparlap otyrǵan isterińiz oryndalmai qalsa, moinyna jaýapkershilikti kim alady? Naqty sonyń aty-jónin aityńyzshy», - dedi depýtat.
Vitse-premer Rinat Zaiytovty sabyr saqtap, oryndy sóileýge shaqyrdy.
«Jalpy Úkimet tarapynan eshqandai jumys istelip jatqan joq dep aitýǵa bolmaidy. Qazir áriptesterim janymda otyr. Qandai jumystar istelgenin, onyń qoǵamda qalai qabyldanǵanyn, jalpy biznes boiynsha jumystar qalai istelip jatqanyn kórip otyrsyzdar. Sondyqtan barlyq másele sheshilmei jatyr, qaralmai jatyr dep aita almaimyz. Biraq jumys pen adam bar jerde kemshilik te bar. Kemshilik joq, barlyq jerde keremet jumys istep jatyr dep aita almaimyz», - dedi Tamara Dúisenova.
https://dalanews.kz/del-qazir/93856-songgy-ush-zhylda-qazaqmystagy-zhalaqy-823-p
