“Aýyl” partiiasy fraktsiiasynyń múshesi Nikolai Arsiýtin Premer-Ministrdiń orynbasary – Mádeniet jáne aqparat ministri Aida Balaevaǵa volonterlik qyzmetti damytýǵa qatysty depýtattyq saýal joldady, dep habarlaidy Dalanews.kz.
Depýtattyń aitýynsha, 2026 jylǵy 30 qańtarda Memleket basshysynyń qatysýymen ótken volonterler forýmynda “Aýyl Jastary” qozǵalysynyń belsendilerimen kezdesý barysynda birqatar ózekti máseleler kóterilgen. Atap aitqanda, jastar volonterlerdiń ómirin saqtandyrý jáne olardyń qyzmetin eńbek ótiline esepteý máselesine erekshe nazar aýdarǵan.
Arsiýtin óz sózinde elimizde volonterlik qozǵalys qarqyndy damyp kele jatqanyn atap ótti. Onyń málimetinshe, 2020 jyly Qazaqstanda shamamen 50 myń volonter bolsa, búginde olardyń sany 300 myńǵa jetken. Qazirgi tańda 800-den astam uiym áleýmettik mańyzy bar jobalardy júzege asyryp, ulttyq jáne 20 óńirlik front-ofis jumys istep jatyr.
“Shyn máninde, bul – qoǵam úshin mańyzdy isterge erikti túrde úles qosyp júrgen azamattardyń úlken toby, olardyń basym bóligi – jastar. Osyǵan bailanysty volonterlik qyzmetti moiyndaý men qoldaý memlekettik jastar jáne áleýmettik saiasattyń mańyzdy baǵyty bolýy tiis”, – dedi depýtat.
Onyń aitýynsha, qazirgi tańda volonterlik qyzmet 2016 jylǵy 30 jeltoqsanda qabyldanǵan “Volonterlik qyzmet týraly” zańmen retteledi. Alaida bul zań volonterlikti tek áleýmettik belsendilik retinde qarastyryp, ony eńbek qyzmetine teńestirmeidi. Sonyń saldarynan volonterlik qyzmet eńbek ótiline kirmeidi jáne eńbek nemese saqtandyrý quqyqtaryn qalyptastyrmaidy.
Depýtat qoldanystaǵy zańnamada tek volonterlik saǵattardy esepke alý, bilim berý granttaryna túsý kezinde artyqshylyq berý jáne memlekettik qyzmetke ornalasýda tájiribeni eskerý siiaqty yntalandyrý tetikteri qarastyrylǵanyn aitty.
Sonymen qatar onyń sózinshe, volonterlerdi mindetti saqtandyrý máselesi de zańmen tolyq qamtylmaǵan. Qazirgi kezde mundai saqtandyrý tek azamattyq-quqyqtyq kelisimshart aiasynda ǵana qarastyrylyp, erikti sipatta júzege asyrylady.
Arsiýtin Memleket basshysy Qasym-Jomart Toqaevtyń 2019 jyly Jastar jylynyń jabylýynda volonterlik saǵattardy eńbek ótiline esepteý qajettigin atap ótkenin eske saldy. Bul baǵyttaǵy usynystar 2020 jyly bekitilgen Volonter jylynyń is-sharalar jospary aiasynda da qaralǵan.
Depýtattyń paiymynsha, qazirgi tańda júzege asyrylyp jatqan 2024–2026 jyldarǵa arnalǵan volonterlikti damytý jol kartasynda zańnamany jetildirý men esep júiesin engizý qarastyrylǵanymen, volonterlik qyzmetti eńbek ótiline engizý nemese qosymsha áleýmettik kepildikter berý máseleleri naqty kórinis tappaǵan.
Ol sondai-aq biyl atalǵan jol kartasynyń aiaqtalatynyn jáne Prezident tapsyrmasymen 2030 jylǵa deiingi jańa baǵdarlamalyq qujat ázirlenetinin atap ótti.
Halyqaralyq tájiribege toqtalǵan depýtat kóptegen elderde volonterlik qyzmet eńbek ótiline engizilmeitinin, biraq eriktilerdi yntalandyrýdyń túrli tetikteri qoldanylatynyn aitty. Máselen, Chehiiada eriktilerdi jazataiym oqiǵalardan saqtandyrý zańmen bekitilgen.
Osyǵan bailanysty Nikolai Arsiýtin Úkimetke birqatar usynys joldady.
“Volonterlik qyzmetke turaqty túrde qatysatyn azamattar úshin eńbek ótilin esepteýde volonterlik saǵattardy eskeretin pilottyq jobany iske qosý oryndy dep sanaimyz”, – dedi ol.
Sonymen qatar depýtat Úkimetke volonterlik saǵattardy eńbek ótiline engizýdiń pilottyq mehanizmin qarastyrýdy; volonterlerdi saqtandyrýdy qosa alǵanda, qosymsha áleýmettik qoldaý sharalaryn engizýdi; volonterlik qozǵalysty institýtsionaldy damytý boiynsha naqty usynystar ázirleýdi usyndy.
