Depýtat Temir Qyryqbaev sharýalardyń jalaqysyn kóterýdi usyndy, dep habarlaidy Dalanews.kz.
Depýtattyń sózinshe, aýyldaǵy sharýalar agrosektordaǵy eń ózekti ári kúrdeli máseleniń biri retinde – kadr tapshylyǵyn atap ótken.
"Ásirese, malshy, saýynshy, mehanizator, veterinar, agronom, zootehnik sekildi mamandardyń jetispeýshiligi bar ekenin jetkizdi. Bul jaǵdai aýyldyq jerlerdegi turmys deńgeiiniń tómendigimen, eńbekaqy mólsheriniń jetkiliksizdigimen jáne áleýmettik qoldaý tetiginiń álsizdigimen tikelei bailanysty" , - deidi depýtat.
Atalǵan júieli máseleler Joǵary aýditorlyq palata esebinde de aiqyn kórinis tapqan. Atap aitqanda, zeinetaqy jarnalary aýdarylmaǵan azamattardyń sanynyń aitarlyqtai kóp bolýy nazar aýdartady. Bul jaǵdai eńbek zańnamasynyń saqtalý deńgeiinde eleýli olqylyqtar bar ekenin kórsetedi. Mundai úrdis jumys berýshiler tarapynan mindettemelerdiń tolyq oryndalmaýy nemese baqylaý tetikteriniń álsizdigimen bailanysty bolýy múmkin.
Májilismen kadr tapshylyǵy agroónerkásiptik keshenniń turaqty damýyna, eńbek ónimdiliginiń artýyna jáne eldiń azyq-túlik qaýipsizdigine tikelei qaýip tóndiretinin aitady.
Osyǵan bailanysty, Qyryqbaev aýyl sharýashylyǵy salasyna mamandardy tartý jáne olardy turaqtandyrý maqsatynda keshendi ári júieli ózgerister engizý qajet dep esepteidi.
Búgingi tańǵa, Úkimet Qazaqstan negizgi azyq-túlik ónimderi boiynsha tolyq ózin-ózi qamtamasyz etýge kóshýdi 2028 jylǵa deiin josparlap otyr. Depýtattyń esebi boiynsha aýyldaǵy sharýalardyń tarapynan kóterip otyrǵan kadrlyq máselesin tolyqqandy sheshpei elimizdi azyq-túlik ónimderimen 2028 jylǵa deiin ózin-ózi tolyq qamtamasyz etýge múmkin emes.
Osyǵan orai depýtat birneshe usynys aitty:
1. Aýyl sharýashylyǵy qyzmetkerleriniń eńbekaqysyn arttyrý maqsatynda Úkimet tarapynan qosymsha tólemder qarastyryp, jergilikti biýdjet esebinen arnaiy sýbsidiialaý baǵdarlamasyn engizýdi;
2. Aýyl sharýashylyǵy salasynda eńbek etetin azamattar úshin jeke tabys salyǵynyń tómendetilgen mólsherlemesin belgileýdi;
3. Agrarlyq kolledjder men joǵary oqý oryndarynda maqsatty granttar sanyn ulǵaityp, shákirtaqy kólemin arttyrýdy usyndy.
