Depýtat bir jylda ózderine 274 mln teńge kóleminde syiaqy jazyp alǵan basshylar týraly aityp, olarǵa shara qoldaný qajet ekenin jetkizdi. «Samuryq-Qazyna» ulttyq ál-aýqat qorynyń qyzmetkerleri halyqtyń emes, ózderiniń ál-aýqatyn arttyrýǵa aianbai eńbek etýde. «Samuryq-Qazynanyń» enshiles «Samuryq-Qazyna Biznes Servis» kompaniiasynyń basshylyǵy kásiporynnyń tapqan paidasynan eki ese kóp bonýs alǵan», – dedi depýtat.
Saiyrov kásiporyn basshysy bir jylda 74,9 mln teńge, basshylyq 274 mln teńge bonýs jazdyryp alǵan, biraq kásiporynnyń taza paidasy 38,5 mln teńge ǵana ekenin tilge tiek etti.
«Óz kezeginde, «Samuryq-Qazyna Biznes Servis» kompaniiasynyń enshiles kásiporny sanalatyn «KAZ KLOÝD» kompaniiasynyń da basshylyǵy ózderine kelgende jomarttyǵynda shek joq. Birinshiden, teń quryltaishy bolyp tabylatyn «Qazaqtelekom» óziniń úlesin jeke seriktestikke berip jibergen. «Bul úles nege, qalai berildi, memleketke zalal joq pa?» – degen suraqtar týyndaidy.
Ekinshiden, osy «KAZ KLOÝD» komaniiasynyń menedjmenti, kompaniianyń taza paidasy 61 mln teńge bola tura, syiaqy retinde bir jylda 336 mln teńge alǵan», – dep málimdedi Erlan Saiyrov.
Depýtattyń dereginshe, «Qazaqtelekom» basqarmasynyń músheleri jalpy 422 mln teńge premiia alǵan. Árbir múshesine 105 mln teńgeden keledi. Bizdiń qarapaiym halqymyz bir úzim nanǵa jarymai júrgende, bul netken asqandyq? «Samuryq-Qazyna» Ulttyq ál-aýqat qorynyń qyzmetkerleri, enshiles kásiporyndary ózderiniń basshylaryna bonýs, syiaqy jazyp alýǵa ǵana qyzmet ete me?» degen zańdy suraq týady», – deidi depýtat.
Ol depýtattyq saýalynyń sońynda mynandai usynystardy aitty:
«Samuryq-Qazynanyń» óz menedjmentine «asyra siltep» premiia jazý saiasatynyń zańǵa sáikestigin anyqtap, bul ashkózdikti toqtatý;
«Samuryq-Qazynada» qujynaǵan enshiles kásiporyndardyń qajettigin anyqtaý;
«Samqryq-Qazynanyń» qarjy saiasatynyń ashyqtyǵyn qamtamasyz etetin tetikter jasaý qajet.
