Májilis depýtaty Abzal Quspan Qazaqstan fýtbolyndaǵy kelisilgen matchtarǵa tekseris júrgizýdi jáne tergeýdi talap etti, dep habarlaidy Dalanews.kz.
Depýtattyń aitýynsha, halyqaralyq Sportradar kompaniiasynyń derekterine sáikes, 2022 jyly Qazaqstan kelisilgen matchtardyń sany boiynsha álemde tórtinshi orynǵa shyqqan. Bul jaǵdai qoǵamda, sport salasynyń kásibi ókilderi men zań shyǵarýshy bilik arasynda úlken alańdaýshylyq týǵyzyp otyr.
"Qazaqstan fýtbol federatsiiasynyń prezidenti Marat Omarov máseleniń bar ekenin ashyq moiyndaǵanymen, ony júieli sheshýge naqty sharalar qabyldanǵan joq. Qoǵamdyq uiymdar men BAQ kóptegen matchtardyń býkmekerlik platformalardan alynyp tastalǵanyn tirkep otyr, alaida mundai derekter tergeýsiz qalyp keledi", – dedi Quspan.
Depýtat álemdik tájiribede kelisilgen matchtarǵa qatysy bar adamdardyń qatań jazalanatynyn atap ótti:
Germaniiada tóreshi Robert Hoizer kelisilgen matchtarǵa qatysqany úshin eki jylǵa sottaldy;
Ońtústik Koreiada 57 oiynshy aiyptalyp, olardyń basym bóligi jazasyn aldy;
Italiiada «Kataniia» klýbynyń prezidenti Antonio Pýlvirenti jáne ondaǵan adam sotqa tartylyp, klýb eýrokýboktardan shettetildi;
Qytaida fýtbol federatsiiasynyń joǵary laýazymdy basshylary men halyqaralyq tóreshiler 5 jyldan 10 jylǵa deiingi merzimge sottaldy;
Vetnamda ulttyq quramanyń oiynshylary 3-4 jylǵa bas bostandyǵynan aiyryldy.
"Mundai mysaldar halyqaralyq praktikada óte kóp. Bul oryndy, óitkeni másele tek memleket pen jankúierdi aldaý emes, matchtarǵa aqsha tigetin myńdaǵan azamatqa jasalǵan qarjylyq alaiaqtyq túrinde kórinis tabady", – dedi ol.
Quspannyń aitýynsha, másele tek fýtbol salasymen shektelmeidi. Qazirgi tańda quqyq qorǵaý organdarynyń nazary negizinen memlekettik organdardaǵy quqyqbuzýshylyqtarǵa baǵyttalǵanymen, kvazimemlekettik sektorda, kommertsiialyq jáne úkimettik emes qurylymdarda da milliondaǵan, tipti milliardtaǵan teńgeni quraityn qarjylyq alaiaqtyq júieli túrde jasalyp keledi.
"Bul saladaǵy baqylaýdyń álsizdigi azamattardyń senimin ǵana emes, el ekonomikasynyń turaqtylyǵyn da shaiqaltady", – dep túiindedi depýtat.
Májilismen Bas prokýratýraǵa kelisilgen match faktilerine jan-jaqty tergeý júrgizip, oǵan basqa da quqyq qorǵaý organdaryn tartýdy usyndy.
